■陸頌雄在標題寫住「『橋』字兩個口」。陸頌雄fb截圖經常將「民意」掛喺口邊，但當結果不利於佢哋時，就會話民意唔重要啦！民建聯日前公佈一項調查，結果發現大部分市民都唔認為「一地兩檢」違反基本法，公民黨黨魁戇橋（楊岳橋）就話喺「呢個問題」上唔應該聽民意，應以大律師公會意見為準喎！負責是次調查嘅民建聯副主席張國鈞就揶揄，咁以後將所有法案「直接送去大律師公會審批得啦！」。工聯會立法會議員陸頌雄亦質疑戇橋「兩個口」，面對法律講民意，面對民意講法律。
民建聯前日公佈一項針對「一地兩檢」嘅民意調查，有六成三受訪者贊成由內地執法人員在西九站指定範圍執行內地刑事法例的做法；四成六認為「一地兩檢」方案沒有違反基本法，五成六認為方案沒有破壞「一國兩制」。
搬大律師公會意見「大」市民
戇橋喺接受傳媒訪問時就聲言民建聯的調查結果有「誤導成分」，稱「一地兩檢」方案有否違反基本法「不應只着眼民意，而是需要有法律依據」、「大律師公會曾發表聲明，指『一地兩檢』方案違反基本法」，「在專業的問題上，應聆聽專業團體意見」云云。
張國鈞就發帖反駁戇橋嘅論據先至係誤導。首先，大律師公會嘅意見書，只係提供一種意見畀大家分析，「幾時變咗終審法院判決？」
佢繼續質疑：「我哋問市民點睇條例草案是否符合基本法呢個問題，係想了解佢哋過去幾個月聽咗社會咁多意見，包括大律師公會和律政司意見之後，佢哋嘅判斷究竟為何，根本不存在楊氏所指什麼民意取代專業。」
張國鈞揶揄公會代替立會
張國鈞還揶揄道：「楊議員將大律師公會意見奉為上諭，咁以後所有法案唔使攞嚟立法會，直接送去大律師公會審批得啦！」
陸頌雄亦喺fb發帖，篇文大大個標題寫住「『橋』字兩個口」，話戇橋對住「一地兩檢」呢件事，竟然大大聲話草案唔係由民意決定，仲用法律嚟大香港市民，話政府要聽專業團隊意見，「冇可能只睇民意，而要回歸返專業」喎。
但係，特區政府解釋咗冇違憲，佢哋又唔接受，主流香港市民都想通過「一地兩檢」，方便搭高鐵，咁多唔同嘅民意數據都可以當睇唔到，繼續唔鍾意就反對，真係好任性、好大嘅官威。
陸頌雄就寸戇橋︰「『一地兩檢』：面對民意，佢同你講法律。旺角暴亂：面對法律，佢同你講「民意」。」再加上「媽我好亂」、「橋字兩個口」、「我講你要信」嘅hashtag（標籤）。
陸頌雄寸惡橋都有兩個口
唔少網民都鬧惡橋等人霸道搬龍門。「Ron Lam」批評：「冇改錯名，羊惡Q！輸打贏要惡到出汁！」「郭耀祖」認為：「『泛民』就係咁樣，有著（着）數就抽水，冇著（着）數就講法律，專鑽空子，好無恥！」
「Rock Wan 」也批評反對派：「『泛民』的强項就係雙重標準，借題發揮，小事化大，指鹿為馬，目無法紀，惡人先告狀，這些技（伎）倆真的呃到唔小（少）人！ 特別是香港出名老襯亭下老襯多！」■香港文匯報記者 鄭治祖、陳川