■劉正出文批評區諾軒喺度侮辱緊嗰啲「堅係日日OT」嘅打工仔。fb圖片稱「事業至上」唔生仔住 「獨」師：侮辱緊啲打工仔
近日有調查發現，兩成香港年輕人表示將來唔會生育，原來包括「尊貴」嘅立法會議員區諾軒？區諾軒前日接受傳媒訪問時話，自己「工時太長，將生仔退為一個好次要嘅目標」喎！咦？唔少網民都狠批佢經常缺席會議，其中一次更只係為咗陪太太去日本旅行，咁都叫「工時太長」？分明係大話啦！不過咁，有人就對區諾軒唔生「表示支持」，「（可以）令少一個靈魂受害，點都係一件好事。」
■香港文匯報記者 鄭治祖
有傳媒喺該項年輕人嘅生育調查結果發表後訪問咗區諾軒。月薪逾9.6萬元嘅妐隉A自己同太太每日都要返工十幾個鐘，難有能力盡父母責任，所以都係「事業至上」，將「生仔」退為「一個好次要嘅目標」。
區諾軒被批離地刻薄
一直同區諾軒有牙齒痕嘅中文大學「獨」講師劉正，近日喺自己經營嘅facebook專頁「無神論者的巴別塔」出咗個Post，轉發咗呢段新聞，仲話要譴責佢呢個「集離地、說謊、刻薄於一身嘅政棍」。
劉正狠批，區諾軒月入九萬六，係全香港收入最高嗰3%人口，「逗住咁嘅人工為咗去日本，連立法會議員最基本嘅責任：開會投票都可以唔做。又曾經因為九點鐘開會太早，就連明明排咗隊發言嘅財委會都唔出現仲夠膽死撐工時長？如果工時包埋你蛇王唔番（返）工去咗幾日日本，咁就梗係『與太太每日上班10多小時』啦！」
曾赴日遊拒投票惹圍插
回吓帶，今年5月底，包括佢在內嘅「飯民」係威係勢咁話要齊聲推倒元朗天橋項目，但到投票嗰日妠N唔知去咗邊。佢俾人踢爆後死都唔肯講自己去咗邊，結果喺成班同道中人圍插下先肯喺facebook話，自己有個「相當重要的事」喎。
係咩事呢？「恕難多講」喎！仲吹到自己「致力克盡己職，小心分配時間」，原來就係同老婆去咗日本旅行。睇返資料，原來佢呢半年嚟都已經同老婆去咗唔少旅行，包括去日本、泰國等等，唔講佢係立法會議員，仲以為佢正職係「旅遊達人」，仲好意思話自己同太太工時長？真係人唔笑狗都吠啦！
劉正仲話，區諾軒喺度侮辱緊嗰啲「堅係日日OT，旅行都無時間去之餘，人工仲要得萬幾兩萬嘅打工仔」，「一個月入成九萬幾仲要成日偷懶嘅垃圾議員話自己好忙，其實同啲富二代呻自己好窮只能靠老豆（竇）買層千幾呎嘅樓、地產商話自己賺得少錢一樣，難×聽過粗口─講到咁×辛苦就咪×做啦，辭職補選啦政棍！」
網民：咁辛苦咪辭職囉
佢最後寸多區諾軒一句：「唯一一樣區諾軒做啱嘅應該係決定唔生仔。我係好信老豆（竇）對仔女嘅影響係好大嘅，令（到）少一個靈魂受害，點都係一件好事。」
網民「Lee Tyson」質疑：「（工時）長？邊度長呀？睇過？」「Stephen Wong」附和道：「咪玩啦，有乜嘢工可以鍾意幾時唔返就唔返，有兩個月暑假，月薪九萬六？真係咁辛苦咪辭職囉垃圾！」
曾代表「東九龍關注組」參加2015年區選嘅鄭國俊就「更正」：「（區諾軒係）雙料議員，點止九萬六。」
「黃美玲」則道：「好多人萬幾蚊，養成頭家啦！」