■陳展鵬以特別方法向單文柔求婚。香港文匯報訊（記者 植毅儀）41歲視帝陳展鵬與28歲前港姐單文柔（Phoebe），自去年3月戀情曝光後一直都十分低調。今年，2人愈愛愈高調，更「情侶檔」搵真銀。昨日展鵬正式公佈迎娶年輕 13年的單文柔，展鵬傾訴心聲表示一路以來，自己都全情投入工作，直至Phoebe的出現，讓我們感受到幸福和信任。是時候用最大的努力去建立一個美滿的家。而展鵬又透露10月將舉行婚禮。
視帝陳展鵬昨日欣然公佈和拍拖年多的單文柔結婚，陳展鵬對傳媒表示：「親愛的傳媒朋友、各位好友，多謝大家一直對我的支持和包容。今日，好高興同大家宣佈，我要結婚啦！一路以來，我都全情投入工作，直至Phoebe的出現，讓我們感受到幸福和信任。對於感情方面比較傳統的我，是時候用我最大的努力去建立一個美滿的家。多謝大家的關心，希望得到你們的祝福！」
十月正式簽紙擺酒
陳展鵬與單文柔的婚紗相也隨即曝光，兩人於法國及英國留倩影，單文柔穿上一條Deep V婚紗裙，騷有料身材，相中可見兩人笑得相當甜蜜。陳展鵬之後接受電話訪問說：「好多謝大家關心，好開心今日宣佈結婚，多謝公司批假畀我同Phoebe去拍一輯好滿意婚紗相，點解要揀喺英國呢，因為Phoebe有段時間在英國住同讀書，留下美好回憶，我哋都去咗巴黎影相，因為自己好鍾意巴黎同意大利。」婚照除咗有歐陸式建築物及街景外，最特別係喺一架寫住「520 Next Station Marry Me」的巴士前留影，展鵬仲單膝跪地向文柔送上鮮花，非常浪漫。說到呢張相，原來有段故，展鵬繼續Sweet說：「大家見到有張相喺英國巴士出面，因為求婚欠咗Phoebe一part，要做完呢part佢先答應我，所以嗰日喺街影咗呢張相，搵咗個場地同巴士。我同Phoebe十月會正式簽紙，同兩家屋企人晚餐慶祝，其他有安排會同大家講。」問到幾時生BB，展鵬表示隨時Ready。
說到求婚過程，單文柔接受電話訪問說：「在香港時，有晚展鵬趁我睡覺時，親手摺了一隻心形戒子，然後套在我手上。第二天起身，我笑同佢講話不算數，因為都沒有問過我，但我都算半答應了他，但他都知道我想要求婚的畫面，所以去英國的時候，他就搵了條街有巴士跪地求婚，所以我就很感動。」
讚單文柔單純又陽光
陳展鵬與單文柔拍拖一年多，當日於港姐比賽時初步認識，之後因此相遇是因談起時裝而打開話匣子，單文柔恰巧在時裝方面有點研究，因而愈談愈投契，愛苗漸漸萌生。雖然二人一直走低調路線，但時不時被傳媒拍到甜到漏拍拖。問到究竟他被單文柔的哪方面吸引，陳展鵬早在今年7月接受本報專訪表示，向來都有成家立室的打算。又大讚Phoebe好單純，好陽光，很似太陽，把自己的冰雪融化。
好友陳山聰接受香港文匯報訪問時，連續講了三次恭喜，山聰謂：「好開心佢搵到人生的另一半，希望他們永遠都幸福快樂。早些生個展鵬仔出來畀我們班兄弟玩下，最緊要幸福美滿。」