教育界立法會議員葉建源早前不求甚解，引用所謂「獲最高等級比率」數據，煞有介事咁話，IB比DSE易拎高分，只要考IB就可以輕鬆入「神科」。葉生講到IB生好似唔使讀書就可以拎高分，聽完真係笑而不語，連網民都忍唔住話：「考IB讀聖保羅架（㗎），邊有得（同全港整體）比？」即係咁，名校考試有20%人拎A，但我間學校只得2%，跟住我唔使睇試卷睇課程睇返同學水平，只要大聲周圍同人唱，話間名校「派A」、「唔公平」，睇嚟我都好快做到議員了！
葉建源話，DSE得唔夠2%考生拎5**，但IB獲7分嘅則有逾24%，高DSE成十幾倍，直言IB更易攞高分，大學收IB生並不公平。喺妦握丑A唔使理學生本身水平係點，考DSE嘅就係「辛辛學子」，但如果你考IB拎高分甚至做到狀元，都只不過係個考試容易，一啲都唔代表你叻。
葉生拎住數據好似執到寶咁，唔用腦唔做背景分析妄下定論，話IB簡單過DSE，真係IB生心裡苦，但無話可說啊。
IB生本身質素高
係人都知，DSE係全港性評核，無論Band 1、Band 2、Band 3生都要考，能照顧到不同學生學習差異。
咁IB呢？在國際上開IB課程一啲都唔簡單，學校要經過國際文憑組織（IBO）多年教學質素及師資評核，斤両同銀両都不可少。
再睇吓香港有開IB課程嘅學校，不少都係公認學生質素高嘅「名校」，不論考乜嘢公開試，全部都成績彪炳。而校內初中生要高中選讀IB，往往需要經過專業評估是否合適，因為IB論文同報告較多，重視學生發現問題、解決問題嘅能力，只係識抄資料同背書根本不可能拎高分。
曾經於教育學院教書做「教育研究」的葉建源帶出一個嚴肅專業的議題，但卻不求甚解，甚至不做試卷、課程的文本比較，只依個人偏見四處宣揚「IB比DSE易拎高分」，實在令人汗顏，也引起不少網民反駁他誤導群眾，將少數名校生與全港整體比較，直言「邊有得比」。
禁入大如自我閹割
網民「James Leung」認為要真正量化IB同DSE，佢話：「除非同一批學生，同一年同時考晒兩邊。」而針對葉建源口口聲聲話要教育公平，網民「Everest Law」一語中的：「禁止IB培養出來嘅學生入大學一定唔係首選（方法），因為係自我閹割『不同種類』人才嘅來源。」
而根據葉建源曾引述的具國際認可英國大學及院校招生事務處「UCAS Tariff」就IB及DSE的換算制度，「神科」代表的港大醫科2017年最低DSE收生分（6科37分）可換算為316分，而最低IB收生分（43分）則為320分，IB收生好似仲嚴格過DSE喎。 ■香港文匯報記者 余韻