行政會議成員、「民主思路」召集人湯家驊（Ronny）慘變「獨眼龍」。話說Ronny上星期去咗張家界旅遊，佢話遇上連場大雨，「連底褲都濕埋」，可能佢不時要用手抹面上嘅雨水，搞到病毒入侵右眼，前日返港已經即時求醫。雖然今次嘅遭遇麻麻哋，但Ronny都好回味當地靚景，話出年高鐵西九龍站有車到張家界，好想坐高鐵再去過。
雖然隻右眼腫到雞蛋咁大，但佢噚日仲頂硬上同傳媒茶敘，只係有一個要求：唔好影佢右眼。
另外，「民主思路」即將踏入第四個年頭，Ronny坦言，當初成立時無立法會前同事睇好佢，認為佢已經唔係立法會議員，再無任何「政治能量」喎。不過時至今日，「民主思路」涉獵嘅範疇越嚟越多，好似有「一國兩制」指數研究同政治行政學院。
佢哋下個月底會搞電影《生生》嘅放映會，希望籌到200萬元經費畀佢哋下年運作，特首林鄭月娥已經應承咗出席，但Ronny就婉拒佢即場捐款喇！ ■香港文匯報記者 鄭治祖