■「學生動源」嘅鍾翰林唔知係葡萄定真係唔想被代表，就發帖話應該尊重民陣喎。「本土民主前線」前發言人梁天琦及黃台仰，一個坐監一個走佬，「香港民族黨」被取締，「獨派」中人自然個個爭住做「大台」。話說幾個「港獨」組織前日參加咗民陣搞嘅遊行，其中「學生獨立聯盟」召集人陳家駒就「代表」班「獨」友接受傳媒採訪，結果有其他「獨派」不滿，話唔應該「騎劫」其他人嘅活動喎。
葡萄有人代表「獨派」發言
話說「學獨聯」及同新近搵咗「青症雙邪」之一梁頌恆做發言人嘅「香港民族陣綫」前日參加咗民陣嘅遊行。
其間，陳家駒同梁頌恆就發言人上身，話「獨派」想通過呢次遊行如何如何咁。「學生動源」嘅鍾翰林唔知係葡萄定真係唔想被代表，就發帖話應該尊重民陣喎。
佢「澄清」話，參加今次民陣嘅遊行，「係由獨立身份人士發起並非由任何團體發起，「學生動源」以及其他團體嘅成員相信都係獨立身份參與。......一直都保持低調希望尊重返發起人士，......我不希望騎劫大會。」
鍾翰林仲加多句，話「希望未來再有任何獨立身份人士發起遊行等活動，所有團體以及人士不應騎劫活動，希望參與嘅組織成員者發表言論時唔好令傳媒誤會所有參與者均為個別團體成員」喎。
fb專頁轉發俾人寸
當日邊個代表「獨派」發言？咪就係陳家駒同梁頌恆囉！有人就抵唔住頸，話鍾翰林自己特登喺「學生動源」fb專頁轉發咗傳媒報道梁頌恆講嘢。「Gerald Ho」就寸返佢：「噉（咁）學生動源喺fb標榜港民陣梁頌恆算唔算協助騎劫遊行。令其他人誤會個遊行係港民陣搞？」 ■香港文匯報記者 陳川