■神駒為老馮抱不平，開火鬧「泛民」假借民主之名，行獨裁之實。 fb截圖老馮（馮檢基）噚日宣佈參選，一直最幫「民主動力」班人嘅《蘋果日報》又出嚟招呼佢，出條題話老馮「反口反口再反口報名」，想營造佢冇口齒嘅形象。雖然有唔少標題黨睇完條題就狠批老馮彈出彈入，但都有好多睇咗全文嘅網民都唔buy呢套，直言︰「人地（哋）都話小麗入到閘會退。原則上只是不滿Plan B。 我唔覺有咩大問題。」 ■香港文匯報記者 甘瑜
老馮報名參選，明明按佢嘅講法威脅唔到劉小麗，最多都係威脅到Plan B你呃人（李卓人）啫，但反對派自從上次補選唔畀老馮做Plan B後，今次就連佢威脅到Plan B都唔畀，都咪話唔絕情。
《蘋果》噚日就大大隻字話老馮「反口反口再反口報名」，第一個反口係話佢曾經講過最後一次參選，咁呢個冇花冇假嘅，雖然你呃人都講過。.
網民：唔覺老基有咩大問題
第二個反口係話佢前日宣佈噚日報名，但前晚又話自己「不出選」喎，睇返馮檢基嘅講法，佢係話小麗老千入到閘就唔出選啫，邊有反口呢？第三個反口就係佢噚日正式報名喎，咁又計到一個，真係方便又快捷。
不過，呢個世界真係有唔少標題黨，一個二個起勢咁鬧。
「Jer Jer Good」話︰「廢老真係麻×煩，彈出彈入又界（𠝹）票。」「May Leung」亦話︰「未上埸（場）就反口覆舌，係君子就應一早承認，膛（堂）膛（堂）正正打一場，現在被人當笑話！我為有些投過你一票的人可悲。」
有啲網民就清醒好多，睇埋《蘋果》報道全文再評論。「Ka Kin Mo」話︰「人地（哋）都話小麗入到閘會退。原則上只是不滿Plan B。 我唔覺有咩大問題。」「Chan Kai Wai」狠批︰「大把人口講民主，但係又唔俾（畀）人出來選，人地（哋）出來選就不停（用）言論去批評佢，真係不知所謂！」
網民：你玩基？基玩你！
「Chow Chowchi」揶揄《蘋果》話︰「選舉近了，《蘋果日報》又發功了。」「Kenny Chan」表示︰「參選，是有自由的。」「Mathew Lee」用返反對派口號︰「真補選，無篩選。」「Wong Lee」再直接啲︰「之前『初選』玩×阿基，而（𠵱）家咪玩×番（返）你『泛民』囉。」
已經視老馮為益友嘅神駒仇思達就大力幫老馮發聲，噚日就出post話︰「大家可以不支持馮檢基，這是自由意志；但是對於『泛民』粗暴踐踏人權、肆意人格謀殺異見人士、無所不用其極造謠打擊對手，卻不能冷眼旁觀。」
神駒批「泛民」趕絕眼中釘
佢狠批「泛民」一邊話反DQ，一邊又DQ馮檢基，然後再出多個post︰「『泛民』只是一個政棍公會，打着民主之名行獨裁之實，意圖成為爭取民主的獨家代理。『泛民』中人及『蝗屍歹（黃絲帶）』，不必對馮檢基落井下石。他日你們與『泛民』有利益衝突時，也會成為下一個馮檢基。」
佢仲非常抵死地話自己個網台有130條線，「你哋遲早打嚟申訴」喎。