■袁天佑頂唔順李卓人同馮檢基咁老都仲要霸住議席。 網絡截圖當大家都以為李卓人已經係「宇宙唯一民主派」嘅時候，估唔到身為同道人嘅「佔中牧師」袁天佑竟然唔支持李卓人。
話說袁天佑日前接受媒體訪問，提到話有反對派中人叫佢為立法會九西補選站台，點知佢拒絕之餘仲要寸李卓人同馮檢基，話兩條友都已經六張，要「知所進退」。唔止咁，原來佢老婆袁師母（陳錦美）支持上次落敗嘅姚松炎出返嚟選，而佢個仔袁健恩就叫人自決投票，講嚟講去就係全家都唔撐李卓人，唔知反對派選民又點諗？
日前《明報》訪問袁天佑，講到下個月嘅補選時，佢就話曾經有反對派中人搵佢去站台，但佢斷言拒絕，感慨話反對派嗰邊嘅李卓人和馮檢基都已經六張啦，叫佢哋要「知所進退」，讓位畀班新人，唔好霸住個議席。
袁師母想落敗蟲炎出嚟選
除咗老竇唔撐李卓人，老媽子袁師母今個月12號都曾經喺fb度表態話反對派「應該出番（返）姚松炎」，擺到明都係唔畀面「宇宙唯一民主派」啦。
袁健恩叫人自決投票
至於阿仔袁健恩就爆李卓人當年2016選舉時口號就話「守護議會」，點知結果就係贊成修改議事規則；而馮檢基就口講「入波靠前鋒，贏波靠中場」，點知實際就「入中聯辦傳波」，再標籤（hashtag）「十四蚊選舉資助你係可以自決架（㗎）」，明顯叫啲反對派選民要自己諗清楚好唔好投畀呢兩條友。
見到全家總動員都咁齊心咁反李卓人，唔少網民都有討論。「Dorna Xu」就認同袁天佑嘅講法：「牧師該是有感而發吧，李卓人和馮檢基你們知道『已60多歲了，要知所進退』的道理吧。不要再阻著（住）地球轉。」
「Ken Chung」就模仿班反對派口脗「指責」話：「有鬼呀！有鬼呀！」
其實好彩袁天佑一家唔係九西選民，至少唔使好似其他反對派咁要「含淚投票」咁委屈啦！ ■香港文匯報記者 何西