■郭晉安決定以後都唔會再買股票，改為買磚頭。三屆視帝郭晉安主演的電視劇《再創世紀》本周來到結局篇，安仔演的奸角奸到出血。劇內安仔扮演一個金融狙擊手，具冒險精神，贏盡天下。但現實生活中，安仔自爆試過做「大閘蟹」，辛苦儲下的積蓄瞬間化為烏有，銀行只剩個位數，要問家姐借錢度日，所以現在寧願買樓都唔再買股票。■採訪：植毅儀 攝影：彭子文、服裝：@Clot by juice_hk、場地：香港九龍東皇冠假日酒店
十九年前拍攝的經典劇《創世紀》，郭晉安飾演性格耿直的馬志強，更成就了一代劇迷的集體回憶。恰好今年播《再創世紀》，遇上香港股災，安仔飾演滿肚密圈的賀天生，贏盡口碑，早前劇集已於內地播畢，不少網民對「賀天生」恨之入骨，連安仔也笑言回內地一定要戴口畢，怕被人打。
「劇中我『太太』楊怡同我是惺惺相惜的戀人，大家目標一致。你話賀天生奸嗎？佢只是為求目的不擇手段，性格好勝。你問心嗰句，呢個社會邊個夠膽話自己完全冇諗過走捷徑、攞着數？只係大家唔敢做，而劇中我就去做咗好多平常人好想做、但唔會去做的事。為了演賀天生這個角色，拍之前睇了香港某幾位富豪的自傳故事，以及『股神』巴菲特、維珍集團創辦人Richard Branson 的自傳，外國人着重冒險精神，輸咗冇嘢的，咪重新再來過囉。中國人比較刻苦，懂隨機應變。賀天生其實很樂觀很陽光，能屈能伸，有點似《蝙蝠俠》中的小丑，好軟皮蛇搞到大家奈佢唔何。劇中林文龍的角色就是Batman，我就是小丑。」
改為買磚頭夠實在
股票市場真令香港人又愛又恨，牛市時，你可以一天賺到心頭好，但熊市時，也可令人輸掉整副身家，再甚者債台高築。安仔曾經試過賭窩輪，買細價股，一秒間沒有了20 萬，但另一秒又賺回20萬，心情起伏如過山車。到2008年雷曼事件爆煲，他的資金全部被凍結，當時他突然醒覺，決定以後都唔會再買股票，改為買磚頭。
「年輕時一定有買過股票，個個都會覺得自己的眼光好準的，一定只有贏沒有輸。但事實係點，咪係你上一分鐘可以贏輛百萬名車，下一分鐘可以輸光身家。當時冇諗過幾秒鐘會損失咁多，買股票其實好刺激，同做藝人好似。你一日未離場，你總覺得仲有翻身的機會。當時買大藍籌，一直唔放咪當擺喺度儲錢收息囉。直到雷曼事件爆煲，我的資金全部被凍結，當時突然醒了，『夠了，不要再玩了。』自那時開始，便沒有再用這樣的方式去賺錢，因為這不是自己的價值觀。自此之後我冇再掂呢方面的投資，現在有錢都會買磚頭，夠實在。」
反叛之心促使再離巢
郭晉安是無綫三屆視帝，今年年初離巢無綫外闖搵銀，轉投王祖藍旗下簽經理人合約，而與無綫就是部頭合約。別的藝人轉投新公司，通常都是重金天價加盟，但安仔卻反其道而行之餘，又沒有簽下工作年期，雙方合作講個信字。
「本身跟姐姐合資做健康食品生意，已經有固定收入，令我可以闖。這不是我第一次離開TVB，1990年代我曾離開無綫兩三年的時間，出去行個轉，接觸不同人及不同文化，令我大開眼界，也明白到當時的自己真的是好受保護的演員。到去年，我心中反叛的心又返來，是時候出去流浪一下，出發外闖，很想試不同的製作。你如果問我，郭晉安唔拍戲，唔做演員可以做咩？連我自己都諗唔到自己的後路。喺呢行兜咗好大個轉，坐冷板櫈時就研究自己的演技有咩問題，機會未到你，一定你做得唔夠好，所以導演唔畀機會你，不停自我反醒同學習，直到《戇夫成龍》演「阿旺」，就是事業的轉折點。選擇簽祖藍，只因為信佢。佢令我好放心，佢令到我好信任佢，即使自己行的每一步有啲咩問題都好，我信佢對我好坦白，會話畀我聽我面對的問題喺邊，跟住要點行。未來會發生啲乜嘢事呢、要點去行，真係好靠個經理人好坦白。」