反對派鬼打鬼都唔係第一日嘅事，不過今次夠膽同「金主」對抗就真係成地花生殼。話說由肥佬黎（黎智英）創辦嘅《壹週刊》日前出咗篇報道，話新來港人士「呃綜援」，仲要講到似層層話佢哋「月入三皮」仲可以買樓又去歐遊，俾班覺得自己好「大愛」嘅「左膠」鬧傳聞當新聞，抹黑班新來港人士。不過，最好笑嘅係班「左膠」不嬲都鄙視內地，仲有包庇仇視內地居民同新來港人士嘅「港獨」分子，咁樣幫新來港人士講好說話，以為可以華麗轉身？又中回力鏢咋啩！
引述僱主就話人呃綜援
壹仔篇報道個標題大大隻字寫住「新移民呃綜援」，內容就引述某個食肆老闆，話班綜援打工仔大多數都係「新移民」，仲話班人為咗避過綜援嘅資產審查，要求每日用現金出糧。篇報道仲寫到班新來港人士好富貴，可以成日去旅行又買股票，月入3萬蚊之餘仲幫埋仔女上樓，而政府又唔會理。係真唔係呀？
寫到班新來港人士咁富貴仲要拎綜援，好明顯都係想煽動仇恨啫。「Loretta Yeung」就鬧：「垃圾政府就係養埋咁多無恥的垃圾！」「Mui Chiu」就話：「難為香港人捱死一世騾仔！都冇咁好福利！最好趕佢班垃圾返『大陸』！」
杜振豪黃浩銘睇唔過眼
結果呢次連班「左膠」都睇唔過眼。職工盟幹事杜振豪就喺fb度鬧呢篇所謂「報道」（見圖），只係聽個老闆嘅傳聞，咁都當係新聞出街，「既然班老細（闆）自己都知現金出糧唔供強積金犯法，就好心佢哋咁委屈嘅就拒絕囉，扮晒自己係受害者博同情！」
佢更質疑個老闆嘅講法，話炒散根本無可能搵到咁多，「退一萬步，呃綜援+人工點可能有三萬？畀盡你綜援金有三五千，基層飲食業員工有幾多人可以搵到兩萬五一個月？」
社民連副主席村短（黃浩銘）都幫班新來港人士講嘢，話壹仔如果無真憑實據就真係唔好以訛傳訛，人云亦云。佢又列咗一堆證據，話居港少於7年嘅綜援受助人其實逐年減少，直至去年底只係佔整體不足5%。
佢又串班仇外者與其淨係聽傳聞就喺度怨天尤人，不如就真係向申訴專員公署投訴，或者搵議員發聲，最後仲標籤（hashtag）「我能理解因為窘迫的生活景況而討厭外來者的感受，但我們不能憑印象或感覺去貶損他人甚至是一個群體。」
唔少網民亦都唔滿意壹仔咁樣做。「蔡玉萍」就批評壹仔同同系《蘋果日報》做法唔道德：「今日《蘋果》兩篇文都很過份（分），極盡煽動仇恨『大陸』移民/非本地出生華人的情緒。」「Calvin Tsang」直接鬧壹仔「可恥」：「煽動族群仇恨的人很可恥，一個半個特別個案就挑起啲族群仇恨很離譜，啲人羡慕就自己去申請試吓，信都低能嘅！」
雖然呢次班「左膠」終於肯講返句公道說話，但明明之前班反對派又好撐仇視內地人嘅「港獨」分子㗎，做咩呢次又咁「大愛」幫班新來港人士呀？吖，唔記得咗李卓人都係「左膠」噃，喺呢件事上點都應該出句聲好噃，仲記唔記得佢細佬蒙兆達寫過文話「議席可以失去，但信念卻絕對不能」喎，唔係因為選舉期間怕咗肥佬黎吖嘛？ ■香港文匯報記者 何西