■職工盟大大隻字話香港勞工權益「零分包尾」，李卓人就梗係廣傳啦。 李卓人fb截圖立法會九龍西補選候選人李卓人搞咗幾廿年所謂「工運」，一直都俾人質疑譁眾取寵、有水就抽，但好多時都係抽水抽着火水，今次亦都唔例外。佢同班反對派「左膠」攞咗世界經濟論壇份2018年全球競爭力報告嚟捽，結果就捽到香港喺一個分項入面嘅一個小項叫「勞工權益」攞唔到分，最後就話香港喺全球140個經濟體當中「包尾」，當然唔少得大肆攻擊政府啦，劇本嚟㗎嘛。不過，原來呢條數係根據國際工會聯合會（ITUC）一個指數得出嚟，指數入面有成45個地方同香港同級或者更低。有通識老師就提醒學生唔好好似班「左膠」咁做「標題黨」，要學曉明辨是非。有網民就覺得李卓人同職工盟要反省吓，唔好當呢個成績唔關佢哋事咁！ ■香港文匯報記者 陳庭佳
世界經濟論壇上個禮拜發表2018年全球競爭力報告，香港整體排第七，都總算係比上不足、比下有餘啦，而呢個數字亦都引起唔到班「左膠」興趣，於是就幾乎拎埋放大鏡嚟捽啲小項，最後捽到香港喺「勞工權益」入面係零分。
職工盟喺facebook大肆宣揚呢個數，仲大大隻字話香港喺呢方面喺全球140個經濟體入面「包尾」，再加上「叻仔呀政府」呢個標籤（hashtag）。選舉臨近，李卓人亦都唔執輸，分享咗職工盟個po（帖文）。
放大小項評分 唔講大項高分
睇返份報告，的而且確係有「勞工權益」小項，而香港亦都真係零分嘅，但排名就係第一百一十六，反映仲有經濟體得分同香港一樣。同時，「勞工權益」小項喺「勞工市場」大項入面，香港喺呢個大項當中排第十一。
仲有就係，「勞工市場」入面除咗「勞工權益」，仲有成11個小項咁多，而香港更加喺幾個小項入面成績唔錯，好似喺「聘請與解僱準則」同「薪酬釐定彈性」當中排世界第一。
世界經濟論壇解釋，「勞工權益」評分係從ITUC喺2017年嘅「環球權益指數」得出嚟。指數將全球國家同地區分成6級，第一級是最有保障，而叫做「5+級」嘅第六級就係最無保障，香港喺2017年位列第五級，同級仲有34個國家同地區，另外有11個係「5+級」。
通識老師比作內容農場煽情
通識老師蕭皓聲就喺網上撰文，指出職工盟係ITUC喺香港嘅代理組織，而ITUC喺網站入面亦都列出唔少香港新聞，除咗有勞工新聞，亦都有「雙學三丑」衝擊政總東翼前地被判囚呢單嘢。
佢又話，香港喺標準工時、退休保障等勞工議題上嘅保障的確不足，但不至於「零分包尾」，例如施政報告提出延長產假、取消強積金對沖都係惠及香港打工仔，而基本法亦都保障咗香港市民組織工會、政治參與同罷工嘅權利，希望同學唔好做「標題黨」，要明辨是非、有獨立思考，「對於誇張失實，斷章取義，純粹煽動情緒而無助理性討論的網上資訊，甚或是內容農場的劣作，我們要保持警惕。」
網民批李卓人職工盟有責任
有網民唔係好受落「左膠」嗰套幾廿年如一日嘅「呃like」手法，「Philip Wong」話：「搞工運搞咗廿幾卅年，香港勞工權益仍畀（俾）外人評為0分，李呃人（李卓人）同佢個會（職工盟），唔係應該好好自我反省一下咩？明嘅，將個波卸晒畀人，自己就可以繼續搵食，高招！」「Lap Sun Ho」亦都覺得：「除了建議工人罷工外，你啅人（李卓人）仲識乜？」
九西補選其他候選人仲有陳凱欣、馮檢基、伍廸希同曾麗文。