■李卓人涉違規「功績」真係多到數都數唔晒。 fb截圖被主流反對派「欽點」參加立法會九龍西補選嘅「宇宙唯一民主派」李卓人，似乎同「違規」兩個字特別有緣。話說噚日就有facebook專頁特登整理咗一條「李呃人違規實錄」嘅片段，包括各種花式違反交通規則、賄選、滋擾衝擊其他候選人等。嗱，李卓人前排先喺補選論壇度數臭另一候選人馮檢基有幾失敗，睇嚟論違規真係唔夠佢「成功」嘅！
衝燈違泊衰齊 吸水花樣百出
噚日facebook專頁「『保普選 反佔中』簽左名揮手區！」就分享咗一條「李呃人違規實錄」片段，整理晒李卓人呢期各式各樣涉嫌違規嘅「功績」，單單淨係數違反交通條例嘅事已經有3大惡行，包括違泊、衝紅燈、車輛行駛時未有佩戴安全帶並將身體伸出車外。
片段又揭發其他反對派政黨為咗幫李卓人拉票，亦有提供各種甜頭去吸引選民，例如提供平價影證件相服務、免費量血壓、平價旅行優惠等。
反對派就成日大肆抹黑建制派以「蛇齋餅糉」扎根地區，但似乎呢次就大大隻回力鏢車落李卓人度啦，唔通李卓人又係「鬼」？
李卓人吸水力強就人人皆知啦，既有收壹傳媒創辦人肥佬黎（黎智英）錢嘅前科，呢排又叫支持者「一人一千蚊」，真係隔住個mon都想像到句「入錢，入錢，入錢！」片段亦提及佢提供嘅捐款戶口資料不清，一時就匯豐一時就恒生咁，咁搞法班支持者想課金都要睇清楚自己到底課去邊。
滋擾其他候選人 惡字行頭
唔止咁，其他仲有未經許可就亂貼海報、深夜嗌咪騷擾街坊、對其他候選人進行衝擊及滋擾，例如佢嘅「Plan A」小麗老千（劉小麗）就不斷用言語挑釁另一候選人陳凱欣，而助選團亦試過喺陳凱欣宣傳期間大聲喧嘩，甚至仲刑事毀壞人哋嘅宣傳品，真係惡字行頭喎！
見到李卓人有咁多「成功」政績，網民都忍唔住狠批佢。「Wing Kiu Leung」就話：「唔駛（使）講啦！佢D（啲）惡行一籮籮，選『李扼（呃）人』嗰D（啲）人心態有問題。」
「Joanna Wong」就呼籲選民眼睛要雪亮：「罪惡滔天又如何？有人肯撐，你可奈何？選民積極去投票，踢走搗亂政棍，才是最上算。」 ■香港文匯報記者 何西