可能對於立法會九龍西補選嘅「宇宙唯一民主派」李卓人嚟講，出賣港人利益真係易過借火。話說日前又有大班反對派為李卓人造勢站台，而佢個黨友、被稱為「假難民之父」嘅工黨張超雄亦都到場支持。張超雄嘅出現，就好似提醒俾「假難民」搞到人心惶惶嘅九龍西選民：原來李卓人所屬嘅工黨，係好積極幫濫用免遣返聲請嘅「假難民」爭取延長留港㗎！不過喺成個選舉工程入面，李卓人好似當「假難民」問題唔存在咁，既然距離投票日仲有幾日，點都要講兩句吖！
提醒選民工黨叫「難民黨」
李卓人作為「宇宙唯一民主派」，自然一聲令下就成班反對派走晒出嚟幫坒艇x啦，但佢好請唔請，竟然請埋張超雄過嚟，仲唔係提醒返大家工黨俾人叫做「難民黨」咩？加上李卓人所屬嘅職工盟同工黨，一向都係積極為外傭爭取居港權，而李卓人更曾經提出過修訂，要將外傭納入最低工資保障，真係撳住納稅人啲血汗錢去搶呀！
熱心狙擊反對派政棍嘅「無敵神駒」仇思達當然亦把握機會抽水，佢話：「『難民之父』一齊支持外傭居港權、爭取將外傭納入最低工資保障啦！」有「難民之父」嘅加持下，相信李卓人都會得到唔少外傭姐姐幫口，叫屋企個阿Sir同Mum支持佢，不過對於長期受到「假難民」問題影響嘅九龍西選民嚟講，似乎就算係含淚又好、含乜都好，都未必肯投佢一票啦！
話就話有好多反對派幫佢站台，但網民似乎就覺得佢哋其實係面和心不和。
「汪洋德」就話：「個個都黑口黑面，尤其是慢必（陳志全）同周庭似乎唔想幫呢條賤人拉票！」
「Catt Sing」就揶揄張超雄作為李卓人黨友都冇得企中間：「做乜事企咁開，一場黨友，企返入啲先係架（㗎）嘛！」
劉小麗被用完即棄靠邊站
「Fong Sitefong」就恥笑連「小麗老千（劉小麗）」都係俾李卓人用完即棄：「『小泥老母』都要靠邊站，話咁快連企係（喺）『李呃人』身旁既（嘅）都無份喇，果然用完即棄，的確係偽民主派慣例。」
正所謂崩口人忌崩口碗，既然李卓人成日口口聲聲話自己無支持過外傭居港權、無出賣過港人，至少都唔好同張超雄企咁埋啦，仲叫做可以呃得吓人。不過咁，其實都有晒證據證實李卓人咁為外傭着想，都唔到佢唔認啦！ ■香港文匯報記者 何西