眼見「宇宙唯一民主派」、工黨候選人李卓人喺立法會九龍西選情唔樂觀，《蘋果日報》噚日就整咗輯《當李卓人輸了》嘅短片，嚇吓大家李卓人輸咗會點。其中，公民黨主席梁家傑（袋巾）嗰句就俾唔少人貼堂，因為佢話「如果李卓人輸咗，香港獨立關稅區一定不保」喎，真係人唔笑，狗都吠，更「驚歎」反對派為咗呃票已經乜都噏得出。有唔少網民就決定癲埋一份，一齊吹大佢咁話︰「李卓人一輸，恆（恒）生指數大跌，連累道指急插，外星人就乘機侵略地球！」
「獨師」寸「把自己看那麼高」
中大「獨」講師劉正就攞咗梁家傑番說話喺坉耖acebook專頁度貼堂，忍唔住潤對方「把自己看得那麼高」、「不如話飯（泛）民輸咗地球會毀滅丫（吖）笨」︰「今時今日飯（泛）民經已狗急跳牆，為咗欺騙選民乜都噏得出。因為你區區一個飯（泛）民議席，美國就會取消香港獨立關稅區？你係咪傻×咗？......究竟係你自己白痴，定係當香港選民全部係白痴？咁嘅水平嘅垃圾，竟然曾經係香港嘅代議士？」
追擊開傳統反對派嘅「無敵神駒」仇思達亦形容反對派「為求勝選不斷造謠」、「完全係擘大眼講大話」。「CL Man」亦話︰「嘩，原來有李卓人先有獨立關稅區，咁嘅大話完全侮辱選民智慧囉。」「Jacky Fan」批評︰「一個大狀都可以噏得就噏！」
有人就覺得呢番說話嘅語氣似曾相識。「Vincent Li」似乎就諗起「城邦派國師」陳雲話︰「梁家傑老師又中！」「Chan Chu Him」亦話︰「『國師』都唔夠人哥來！」
網民陪佢癲：輸咗恒指大跌
有班網民就索性陪佢癲，「Tse Ngai Sing」認為︰「如果李卓人輸左（咗），曼聯前四位置一定不保......」「Charlie Chan」想像︰「佢輸咗美國會取消香港關係法，美中會開戰，續而引發WW3（世界第三次大戰），最後互射核彈地球毀滅。」「Eric Kh」更寸︰「李卓人一輸，恆（恒）生指數大跌，連累道指急插，外星人就乘機侵略地球。」
何俊賢諷反對派可召喚隕石
民建聯立法會議員何俊賢亦忍唔住笑，揶揄道：「你話李卓人選唔到會自殺，我信。你話李卓人選唔到會移民火星，我都信。你話李卓人選唔到影響到國家級貿易戰，真係唔好玩啦，大佬，咁已經選左（咗）入去那些議員應該有能力召喚宇宙隕石了吧？」
■香港文匯報記者 甘瑜