區議員成日都會關心街坊，有時有多嘅物資都會派畀街坊用，都唔係咩新鮮事。不過，民協總幹事李庭豐近日就好似「驚世大發現」咁向傳媒「爆料」，話民建聯屯門區議會主席梁健文向街坊免費派過百架買餸用嘅手拉車喎，質疑梁健文搞「蛇齋餅糭升級版」、「買支持」咁話。你真係當市民第一日望住你班反對派做嘢咩？有網民就貼咗好多張反對派議員嘅海報，由派糭、派奶粉、蛇宴到平價旅行團都有，揶揄道︰「『泛民』區選贏硬啦！」
可能係咩人睇咩嘢啦，之前民協先俾人踢爆喺立法會九龍西補選涉嫌賄選，一邊幫李卓人拉票，一邊派啲「打預防流感針活動」同「曲奇製作班」單張，俾人質疑係咪可以以免費活動去叫人投票。過咗一排，民協又忽然正義返，個總幹事李庭豐突然指責梁健文向街坊派手拉車喎，話事件「令人震驚」喎。
有啲網民都跟住起哄㗎，雖然仲有成年先到區議會選舉，但「陳瀚宇」就鬧爆梁健文話︰「又系（喺）到（度）明目張膽甘（咁）賄賂選民啦！次次建制賄選完都吾（唔）認先系（係）最賤格。」
反對派區區派贏硬
見到有啲網民咁耿直，「Terry Tsang」就貼咗好多張反對派嘅海報，由派糭、派奶粉、蛇宴到平價旅行團都有，涉事人物包括公民黨譚文豪、民主黨林卓廷同尹兆堅等，「Terry Tsang」揶揄︰「『泛民』區選贏硬啦！」事實上，民協副主席何啟明之前都俾人踢爆搞啲平價旅行團，唔知李庭豐對呢件事又震唔震驚呢？
其他網民都覺得平日派吓嘢其實好平常。「David Yau」反問︰「民生工作有什麼問題，政府派公屋是貪污嗎？」「Philip Chan」直情讚架手拉車︰「好有用吖！」 ■香港文匯報記者 甘瑜