■神駒形容攝石黎係「姣婆守唔到寡」。仇思達fb截圖長年俾人恥笑讀唔成書就學人走去做政棍嘅「香港眾志（中箭）」前副主席攝石黎（黎汶洛），似乎喺新一年嘅開始又成為大家嘅笑柄。「無敵神駒」仇思達日前發帖恥笑喺街度掛咗自己大頭橫額嘅攝石黎，揶揄佢明明之前話自己會專心學業，點知轉頭又想出嚟選區選。有眼尖嘅網民見到攝石黎嘅橫額自稱「總幹事」扮晒嘢，仲奉勸佢咪再出嚟獻世做炮灰。
自封「總幹事」邀功
神駒日前發帖，話攝石黎消咗磁一段時間之後，近期似乎又想上磁刷存在感，印晒橫額話自己成功爭取乜乜乜咁，就恥笑佢：「呢隻『學民（學民思潮）』餘孽真係死而不僵，又話專心學業，而（𠵱）家又姣婆守唔到寡，死返出嚟想選區議員！」
唔少網民都揶揄攝石黎衝出嚟做炮灰，網民「Kwokchun Cheng」就恥笑：「傻仔，民建聯喺安達開始入伙嗰陣已經落咗人做嘢！」
「呆靈」就寸：「又出返黎（嚟），到底佢同腎弟（盧斯達）邊個比較多『老是常出現』？」
有眼尖嘅網民就見到攝石黎喺橫額自稱「安達邨總幹事」，質疑屋邨哪來的總幹事。
「Sn Chan」就問：「乜家吓屋邨有『總幹事』做架（㗎）咩？」「Tik Dylan Kan Sn Chan」就話：「屋邨有互助委員會同看更就聽過，總幹事？當條屋邨係大學宿舍，玩上莊呀？」
被回帶質疑語文差
其實要提攝石黎咁有心選舉，都要好有勇氣先得。2016年立法會選舉時，佢本身都話要選九龍東，結果因為冇錢所以冇聲氣，只可以睇住羅冠聰去選港島，再睇住佢DQ埋射晒啲錢落海。
早排佢參加社工註冊局成員選舉，結果得700幾票，俾人大幅拋離，又一次斷咗條路。唔止圈內唔睇好佢，連網絡紅人「瓊姐」都恥笑過佢，皆因佢文憑試得4科二級，其中英文仲得一級，連「瓊姐」都笑佢連基本語文能力都冇，仲學人選立法會，真係分分鐘睇唔明文件喎！■香港文匯報記者 何西