■各地粉絲專程前來支持。香港文匯報訊 因為參加內地選秀節目而爆紅的許靖韻（Angela）日前於廣州中央車站展覽廳舉行第一個售票音樂會《Angela First Tour 廣州站》，近千人的場館全場爆滿。
近兩個小時的演唱會以歌會友為主，當晚Angela換了兩套衣服，除了騷唱功外，仲大晒音樂才華，更一口氣用鋼琴自彈自唱四首歌。Angela話音樂會前期待之餘又緊張，「喺廣州第一次有自己賣飛的音樂會，開騷之前都好緊張，但係又冇乜時間緊張，因為前後得兩個星期去準備成個音樂會，排練、諗歌、度rundown。一路都冇特別去諗過自己可以有賣飛嘅音樂會，覺得呢件事好似等咗好耐、好期待，然後又好快就發生。」
粉絲製「粉紅海」
第一次開騷，Angela話有好多難忘事，當中有觀眾嗌「安哥」印象特別深刻，「其實之前都冇特別諗安哥嘅嘢，到咗真正開騷時，我都未唱完，啲觀眾已經嗌安哥。其實之前隊band都有問過，如果啲人唔嗌安哥咁點？哈哈。所以係好開心，喺我未唱完嘅時候就嗌安哥，同埋覺得好搞笑。」而歌迷的支持亦令Angela好感動，「我知道有好多粉絲係特登買機票飛過嚟睇我第一個音樂會，又要book酒店，呢樣嘢我已經覺得好不可思議，同埋好感動。」Angela更表示要特別多謝陳芳語和吳香映的粉絲，「因為佢哋嘅粉絲都有送花籃過嚟，真係好開心咁多人支持。」
粉絲們除了親身到場支持，更做了好多有心思的事情，「我一入到去化妝間，就已經見到擺滿晒佢哋送嘅粉紅色蛋糕、枱布都係粉紅色、氣球都係粉紅色，全部嘢都係粉紅色，佈置咗一個好靚嘅化妝間畀我。會場門後，佢哋擺咗好多花籃、好多可以畀人打卡嘅相框，做咗好多好有心思嘅嘢。之前粉絲話如果我開騷，佢哋一定會為我準備一個粉紅色嘅海，即係佢哋會拎住粉紅色嘅燈棒。音樂會當晚我真係見到呢個粉紅色嘅海，但好搞笑嘅係，個粉紅色嘅海，去到音樂會尾聲時有啲冇電，哈哈哈。」