俾人放飛機係咩感覺？咪㷫囉！一班小販，有啲無瞓過，有啲專登唔開檔，噚日諗住出席立法會食物安全及環境衛生事務委員會特別會議，同官員、議員傾重新編配空置小販攤位，點知喺入面等呀等，最後竟然因為法定人數不足而流會。平時大大聲話要撐小販、撐墟市嘅反對派議員，今次亦都有唔少人無出席會議，結果就梗係做咗眾矢之的啦，就連唔係委員會委員、選舉時高舉「關鍵一席」嘅公民黨黨魁戇橋（楊岳橋），亦都俾網民挖出嚟笑。聽落好似係躺着也中槍，不過戇橋你啲「關鍵缺席」記錄仲厚過本電話簿，俾人抽錯水都唔怨得人㗎。
爭兩個先夠數終流會
立法會食物安全及環境衛生事務委員會噚日原定舉行特別會議，邀請團體就重新編配空置小販攤位建議安排表達意見，不過等咗15分鐘，都只係得8個委員出席，爭兩個先到法定人數，最終流會收場。8個出席委員當中，建制派有張宇人、潘兆平同陳凱欣，反對派除咗本身係委員會主席嘅郭家麒之外，都只係有陳志全、尹兆堅同邵家臻。而醫學界陳沛然亦都有出席。
反對派噚日本來冧人出席特別會議，好似民協、「小麗民主教室」、「社區前進」仲有衛星組織「撐基層墟市聯盟」、「關注綜援低收入聯盟」都派咗代表，但搞完場大龍鳳都係得個桔，唔到佢哋唔遺憾啦。
嗰幾個團體仲話，有檔主放棄謀生時間都要嚟開會，有午夜墟街坊更加係凌晨收檔就趕去立法會，結果就「被滅聲」嘞。
毛婆朱凱廸等同列戰犯
不過，佢哋又有無估到係衰喺自己人手上呢？喺22個缺席委員當中，就出現咗「民主派會議」召集人毛孟靜（毛婆）、區諾軒仲有朱凱廸呢啲平時大大聲話要撐小販、撐墟市嘅反對派議員個名。
「Steven Leung」睇唔過眼：「又話幫啲小販基層？啲所謂『本土派』去咗邊？毛姨姨呢？區諾軒呢？仲有朱×廸（朱凱廸）呢？」
「Edward Fort」就摷返毛孟靜之前講過幾咁關懷小販嘅言論出嚟：「喂呀，乜毛孟靜你好忙開唔到會咩？又話我要真小販嘅？」
「戇橋」劣跡多 被抽水無得怨
戇橋雖然唔係委員，但佢劣跡多成咁，今次都係做咗箭靶。「Cmp Chung」話：「睇缺席已經習慣第一時間搵關鍵一席（戇橋）個名。」
嘥心機捱眼瞓嘅仲有食物及衛生局副局長徐德義，佢喺流會後就話，局方樂意聽取持份者嘅聲音，如果立法會再作安排，都好樂意再到立法會聽取意見。個會就定咗今個月28號補返，不過小販唔開檔、無瞓過嘅損失，就點補都補唔返。 ■香港文匯報記者 陳庭佳