毛婆貼中聯辦邀請函，順手公開中聯辦人員的手機號碼。做得「民主派會議」召集人，係咪連基本嘅尊重同保障人哋私隱都唔識呢？話說毛婆（毛孟靜）噚日喺facebook上載中聯辦張邀請函，入面有中聯辦人員嘅手機號碼，但毛婆一於少理，冇遮冇掩直接上載，完全唔尊重人哋私隱。
佢咁做係有心定無意呢，就好難講嘅，要反對派仔細睇文件，哪怕只係一頁，都真係好高難度㗎，所以都唔排除佢係真係冇為意嘅。不過，毛婆似乎見到個問題都唔諗住改囉。網民「Chung Siu」已經留言話︰「打6×××××××，搵趙生留位......」擺明想搵人搞事，但毛婆明明一直都有覆網民留言，理應睇到呢個問題，但個邀請函繼續係原封不動咁掛喺fb度。佢係咪有心搞事，相信市民都自有公論嘞。 ■香港文匯報記者 甘瑜