■EQ話今年繼續用返舊嘅利是封，夠晒環保。 香港文匯報記者何西 攝民建聯立法會議員葛珮帆（EQ）噚日特設新春盆菜宴，同傳媒朋友拜年之餘，亦慰勞大家一路以來嘅辛勞。EQ派利是畀大家嘅時候，又特別提到自己所用嘅利是封，話今年繼續貫徹環保嘅作風，派嘅利是都係循環再用過去一年所收集返嚟嘅利是封，同時亦呼籲大家都加入「再用利是封」嘅行列。
有記者就現場爆料，話「新民主同盟」嘅范國威本來上年都有「再用利是封」，不過環保咗一年今年就冇再用，原來係因為回收返嚟嘅利是封大多數都係民建聯嘅，所以就費事幫對家宣傳啦。EQ就笑言話自己都收到唔少反對派黨派嘅利是封，不過佢就話用得唔好嘥，可以用嚟摺一啲裝飾物，夠晒環保兼創意爆燈喎！
預告助單親家發聲
喺大家等緊盆菜滾嘅時候，EQ又擔起做司儀嘅大旗，講笑咁話︰「喺盆菜煲緊嘅時候，我哋就最好拉一拉布傾下偈啦！」佢透露自己今年大計係支援多啲單親家庭，話自己接到好多同類型個案同投訴，話現時政府未有專責部門為單親家庭提供支援，而社會上亦好少人為佢哋發聲。
EQ又話，自己過去一段時間都有同單親協會討論，所以就準備喺立法會度提出動議辯論，「一抽到籤就即刻搞啦。」繼以往一直關注創科、婦女事務同保安事務外，EQ又再關注埋單親家庭權益，佢就笑言：「好多人見我做咁多嘢，以為我個議員辦公室有好多人幫手，其實真係得幾個後生仔女，所以我哋606（議員辦公室）往往都係立法會最繁忙嘅一間房。」 ■香港文匯報記者 何西