■張美雄喺fb批評《蘋果日報》「錯漏百出、唔核實消息就報道」。 張美雄fb截圖傳統反對派喺過去嘅幾次補選中屢戰屢敗，被指為「泛民金主」嘅壹傳媒集團老闆黎智英好似唔係好沉得住氣，一方面打倒昨日的我，頻頻利用旗下報章吹捧旺角暴徒，一方面就係開始認親認戚。話說《蘋果日報》有篇報道，將「將軍澳民生關注組」召集人陳展浚都歸類為「泛民」，仲幫佢口攻擊「將關組」喺區議會選舉嘅對手、西貢區議員張美雄。張美雄就發帖大鬧《蘋果》報道求其唔fact-check（求證事實），為「自稱『泛民』既（嘅）人漂白」，仲抹黑對方，係嚴重愚民咁話。 ■香港文匯報記者 陳川
陳展浚係邊個？相信佢喺當區嘅居民之間應該已經出晒名，比較多人講嘅幾單嘢包括：
曾經係「學民思潮」成員，但因「個人操守問題」而被勒令退出，其後更被「學民」發聲明質疑係喺離開「學民」後，3次冒認「學民」成員向不同政黨索取金錢及提出協助助選。事後，佢話報道呢單嘢嘅《壹週刊》「出名亂寫」，所有指控都係失實；
喺上屆區選聯同「地區好友」與「新民主同盟」講數，稱若「新同盟」派人去軍寶區參選，他們就會派員到已「劃畀」「新同盟」的選區「鎅票」，「一命換一命」，搞到對方去廉署投訴；
去有意同佢爭將軍澳富藍選區嘅對頭「將軍澳青年力量」嘅fb留言挑機，鬧人鎅票；
喺未經公民黨立法會議員楊岳橋同埋其他議員嘅同意下，喺自己的海報印上「楊岳橋議員辦事處」嘅字眼等等。
同「泛民」唔妥都當「泛民」
唔知《蘋果》係咪覺得「泛民」不嬲都係咁樣樣嘅，所以照「封」佢做「泛民」，仲喺今個月用《「泛民」動員協助 光復日出康城 》為題，報道「本身有『泛民』背景」、「日出康城居民」陳展浚等，因為舊業委會「縱容」港鐵喺屋苑執漏上「hea」做，所以憤而參選業委會咁話。
一方面就扮偉大，一方面就想搲「着數」。佢話「若沒有『泛民』動員協助，單靠小業主難以成功」，又稱對手「做好多騎呢嘢」、例如「散播流言人身攻擊候選人」、「向對方僱主投訴」等等。然後，佢就話：「以往康城及峻瀅各期業委會都與西貢區議員方國珊關係密切，方國珊更會動員為業委助選。」咁咪等於講到明，佢口中「做好多騎呢嘢」嘅對手係方國珊撐嘅？
屈方國珊與業委會關係密
方國珊嘅拍檔張美雄喺蘋果App睇到呢單新聞後，就喺fb發帖批評：「連第一句都已經錯漏百出，可想而知《蘋果日報》係一份幾咁求其、人地（哋）報咩照單全收唔fact-check既（嘅）報紙。」
佢話：「（《蘋果》）永遠將所有事情簡單化二元對立，將自稱『泛民』既（嘅）人漂白，另一邊即使只係普通居民或堅持無黨派人士，都要刻畫（劃）成殺人放火與『泛民』對抗的霸權，嚴重愚民。」
張美雄強調，「來說圍標者，就是圍標人」，「愈來愈多屋苑小業主明白此道理。......路遙知馬力，任何政黨入侵都唔會幫你解決到屋苑問題，相反只係會利用呢個平台搵著（着）數。大家有時間親身去接觸，一定要睇實有政黨背景的業委會/法團，以往中過伏既（嘅）唔好再中，切勿亂信或簽授權書（畀其）他人。」
佢仲話已刪除蘋果App咁話。
「新同盟」白鴿黨聯手封殺
唔少網民都撐張美雄喎。「Michael Tong」形容：「陳展浚個底好花。」「Chun Hin Au」亦話：「花到連『新同盟』，民主黨要聯手封殺。」「Edward Pang」直言：「姓陳呢位......蘋果都唔查下（吓）佢過去的『歷史』，佢講乜都信？唔怪得愈來愈多人話佢地（哋）唔掂......」
「Neil Cheung」也道：「低能......峻瀅都唔係地鐵管理既（嘅）......我地（哋）又何時親過方國珊和任何議員或連議員都不是的人......九唔搭八。」「Sherman Chiu」就話：「喜見有咁多人看破了乜乜物物所謂嘅『關注組』所作所為，完全為搶刼（劫）法團資源搞選舉操作。」