怪事成日有，今年特別多；有過案底嘅「歡樂小子」，長達三年唔准跑夜賽，點知忽然暗中被解禁，報咗昨晚賽事，競賽小組先披露原委，雖然拆得掂，但就有多少「兜」味囉。又好似剛周日的一班千二米草地，竟然出現四匹馬參戰，要知道一班賽第五名獎金亦有91,875元，馬主分得六萬元，扣除約八千元報名費，夠一個月養馬費有餘，唔通啲練馬師及馬主嫌錢腥？當中出現了甚麼問題？是馬匹不足？賽程編排不理想？還是其他原因？相信有關人等會作檢討。咁點解有錢都唔執？睇番呢場千二米限九十五分或以上，照計呢個範疇少極都有六、七十匹，撇開四歲精英留力打吡大賽，再減埋當日第八場九匹跑千六米，仲有好多短途馬可以湊興，好似三戰三捷「帝豪福星」咁，其餘「旺蝦王」絞腸痧要唞；「五十五十」、「天下為攻」、「翩翩」、「小巨人」停課多時，「首映」放草到四月尾，次一皮「真好彩」流鼻血，咁你話仲有乜短途馬？可以想像嘅係下月千二米二級賽，又係「紅衣醒神」鬥「爭分奪秒」單打獨鬥局面。
另一方面，澳洲農業及水資源署前年年底突然向香港實施限制，凡香港本地或途經香港嘅馬一律唔可以直接運去當地，就算曾經喺香港出賽嘅澳洲馬，都要去其他地方停留檢疫一排先返得去。呢項禁令嚴重影響咗馬會同澳洲賽馬機構嘅合作關係，最近終於局部解禁，澳洲馬征港回程再冇入境管制，但係香港本地馬依然唔可以直接去當地。澳洲當時推出馬匹出入境限制，係擔心馬會嘅從化馬匹訓練中心運作後，本地馬經常往返中港兩地會出問題，明顯係信唔過內地檢疫制度，嚴格嚟講唔係針對馬會。有時又難怪人哋咁小心，英國最近就因為馬匹疫症要全面停賽，賽馬同育馬係澳洲嘅大產業，爆起馬匹疫症肯定損失慘重，就算馬會咁高國際聲譽，都消除唔到人哋戒心。
喺禁制令實施呢年幾時間，無論馬會同澳洲賽馬機構都唔多過癮，澳洲嗰邊梗係唔敢派馬過嚟跑國際賽，少咗個傳統賽馬大國參與自然失色不少。繼續維持禁令，係兩邊都冇着數。平心而論，馬會高層過去呢段時間做咗好多嘢令雙方破冰，馬會一直表現非常忍讓同有胸襟，冇話一刀切飛起墨爾本盃賽日呢啲經典大賽。無論點都好，大家都係睇利益，睇吓下個月尾嘅冠軍賽馬日，有冇澳洲馬重臨出賽。最理想梗係快啲解除禁令，本地退役馬運返原產地都唔使咁麻煩。