■街坊聽劉慧卿訓話嘅表情。 短片截圖只許自己友喺議會叫囂、搶手機、傷保安，唔畀街坊市民示威抗議？講緊嘅咪就係民主黨班人囉。話說馬鞍山錦英苑個業主立案法團上個月搞新春賀歲嘉年華，遇到一班小業主踩場示威，不停噓爆台上發言嘅人。企喺台上嘅民主黨卿姐（劉慧卿）即刻「破音」大罵「你搞『文革』啊？豈有此理！」、「香港好似冇咗法治咁，喂！有人喺度搞活動，可以有人搞破壞嘅！」仲暗寸埋街坊唔文明𠻹。唔少網民見到卿姐咁樣大動肝火、振振有詞，都為佢隔籬嗰個林卓廷滴晒汗，唔知民主黨班成日擾亂秩序嘅人聽到，自己會唔會心虛呢？
寬己嚴人 唔准業主噓
噚日網上瘋傳一段短片，片中卿姐同林卓廷出席錦英苑個業主立案法團上個月搞嘅新春賀歲嘉年華，但在場嘅街坊業主就喺度抗議，仲不停以噓聲表達不滿，搞到台上卿姐、林卓廷仲有法團班人直接俾人開年。
卿姐似乎原本仲以為自己有啲江湖地位，攞住支咪想勸大家靜落嚟，但點知班業主嘅噓聲越噓越響，卿姐自己都越講越激動，由一開始話香港係文明社會，大家可以平心靜氣解決問題，到後來直接鬧班示威業主，話「你搞『文革』啊？豈有此理！」、「香港好似冇咗法治咁，喂！有人喺度搞活動，可以有人搞破壞嘅！」仲話佢哋「搗蛋」，問警察去咗邊𠻹。
不過，民主黨𠵱家既有許智峯喺立法會搶手機、傷保安，連卿姐隔籬個林卓廷同尹兆堅都有單傷保安嘅案件喺身，聽到卿姐咁忽然理性，唔少人都好驚訝，亦都戥企喺隔籬受到應一應嘅林卓廷滴晒汗。
「曾麗文」留言揶揄︰「渠（佢）嘅發言真係精彩過立法會！『依（𠵱）家人地（哋）有節目呀，你做咩要嚟搗蛋呀？』」「Chales Cheung」附和︰「係囉，咁點解當年劉議員要瞓街呀？」
「Robert Chan」直言︰「終於都惡有惡報，你地（哋）搞得人地（哋）多，都應該感受下比（俾）人地（哋）搞返你啦！」「KamWing Tse」就話︰「民主黨有冇諗吓自己經常在立法會搞破壞，圍堵主席，被抬出議會？如今受到市民同樣的對待，就受不了，民主黨實在有冇反省檢討自己過往的所作所為，真係令市民非常討厭！」
「Teng Che」寸爆咁話︰「民主有兩把尺，寬己嚴人。」
法團改選無期惹不滿
咁到底點解佢哋會遇到示威呢？香港文匯報記者問過地區友好，原來係因為錦英苑（二期）個法團本身應該喺今年1月搞周年業主大會，其間仲會有改選，點知法團開會前一晚臨時取消大會，個大會拖到𠵱家都未開，但個法團又有時間心機喺上個月搞所謂新春賀歲嘉年華喎，班業主當然唔忿氣，當日拉大隊去踩場示威，一路噓爆台上班人，而示威期間其實都聽到有人嗌話「我哋要選舉」。
唔知卿姐鬧人之前有冇了解過市民苦況呢？「Chales Cheung」就揶揄佢哋︰「作為『民主派』，在高牆與雞蛋之間，原來係站在高牆一方，去責罵要求選舉既（嘅）小業主。」■香港文匯報記者 甘瑜