■網上有人散播謠言，稱多國將取消香港護照嘅免簽證待遇，引來網民恥笑。為咗呃多啲人去反對修訂《逃犯條例》，反對派到底可以講幾多大話？繼早前公民黨前主席余若薇斷章取義香港文匯報同大公報對權威人士解讀國務院副總理韓正嘅講話，老作話「危害國家安全罪行移交內地審」之後，呢兩日網上又有人散播謠言，話修例一旦通過，歐盟同日本都會取消香港護照嘅免簽證待遇喎。唔少網民真係俾佢哋嚇一跳後得啖笑，索性留言揶揄︰「不如作大啲派兵來打中國啦。」
facebook近日開始流傳一批「修例之後冇免簽」嘅文字圖。其中一幅由網民「Lam He Wong」發佈，張圖大大隻字話「逃犯條例通過，日本、歐盟或考慮取消免簽證」，個post（帖文）就宣傳反對派嚟緊個反修例遊行。
有理無理播咗謠先
咁大嘅消息，媒體都冇報，到底來源來自邊呢？「Lam He Wong」話消息來源係「連登仔」，仲附咗條link（連結）喺度。不過，條link講嘅係多國領事日前去立法會嘅新聞，根本就冇取消免簽嘅內容，只係有人話「如果真係取消簽證啲『港豬』會開始留意時事」，但呢位「Lam He Wong」有理無理就播咗謠先。
有啲網民就真係俾「Lam He Wong」嚇親，即刻留言話要去遊行，但有心水清嘅網民就提出質疑。「Ken Lee」話︰「樓主你呢編（篇）新聞有無連結啊？老老實實我真係搵唔到有呢單新聞喎！......有不滿自然會出嚟行，搞埋晒呢啲假新聞去恐嚇啲人出嚟行，另有用心嘅方法，好容易有反後（效）果㗎！」「Fong Leonardo」就表示︰「『泛民』為求捐款，真係講得出就講。」
唔好以為播謠呢啲嘢得盲毛先會做，作家陶傑都喺fb轉貼咗另一張圖，話「『逃犯條例修訂』通過後，你的特區護照將會冇免簽證」，張圖仲有啲細字「解釋」，話當各國唔認為香港同內地（有）分別，就「可能」不會再俾（畀）特區護照免簽證喎。
陶傑話︰「這個廣告不太公平。」
最怕流氓「有文化」
一開始仲以為佢想講個廣告亂噏，但原來佢自己都亂埋一份，話堅持修例嘅係香港特首，「取消特區護照免簽證進入歐洲和日本，等同濫用化療，癌細胞和良好的細胞同時擊殺。」佢仲話，西方「列強」如果要開刀，可以取消特區政府高官全體居英權，「冤有頭債有主」喎，真係噏得出就噏。
陶傑嗰邊嘅留言就得人驚啲，基本上都信晒佢講咁。「Plato Lai」話︰「特區護照好快變三流護照。」「Aika Lee」就興奮話︰「呢招絕呀，平時口口聲聲我討厭政治既（嘅）港女，懶超然，實死蠢既（嘅）港豬，都要出黎（嚟）上街呀。分分鐘超過100萬（人）。」
就好似余若薇斷章取義都有人幫佢廣傳咁，呢啲真係流氓不可怕，最怕流氓「有文化」嘞。 ■香港文匯報記者 甘瑜