■劉德華(左)與古天樂(右)合唱電影主題曲。香港文匯報訊 邱禮濤執導、劉德華監製聯同古天樂、苗僑偉、林嘉欣主演的《掃毒2天地對決》將於下月16日上映，而兩位影帝劉德華、古天樂為電影合唱主題曲《兄弟不懷疑》。
雙雄首次合唱，可算是為音樂市場上注入新力量，古仔先笑言：「咁大件事？咁都好可歌可泣啦喎！唱歌我業餘啫，唔好咁講。」華仔聞言也笑說：「我都係業餘到現在，哈哈！諗返起對上一首剛陽味重嘅歌，都好多年前同偉仔嘅《無間道》，所以現在市場上都需要返啲男性嘅音樂同歌曲。」華仔有大量音樂作品就不在話下，唔知華仔有冇聽過古仔的音樂？古仔笑笑反問：「華哥有冇聽過我啲歌呀？」華仔即說：「有！我都聽過好多，但真真正正講個歌名出來真係幾難，哈哈哈，在錄音過程中，知道古仔會擔心自己做得唔好，但佢睇小咗自己，事實上佢做得好好！我幾鍾意佢唱『關係』嗰段，大家留意下。」古仔聽到要為對方評分的話，他立即笑說：「咁我一定係零分，而華哥就一百分！」
《掃毒2天地對決》主要講述雙雄之間的兄弟情，《兄弟不懷疑》的歌詞是出自監製及主角之一的劉德華手筆，問到華仔為這份詞寫了多長時間？他說：「確實寫咗幾耐真係唔記得，寫咗幾日吧，寫嘅時候腦內畫面諗住同古仔之間嘅兄弟情、亦有我自己戲內同其他兄弟之間嘅兄弟情！其實份詞主要係想講，大家兄弟之間好客氣，有啲嘢一早講出來就冇事，但大家就係點都唔會講！最後就會懷疑大家，之前嘅感情就會變質。」對於歌詞有否給予意見，古仔就話：「佢哋有畀份歌詞我睇，我第一個反應係『唔好玩啦！我都唔識唱歌，點畀意見啫』！」
至於問到在錄音時分別腦內想像什麼來投入感情，古仔表示：「諗起最後Ending在地鐵內嘅畫面，十幾年嘅兄弟情，因為大家唔肯聽大家講嘢就冇咗。」