■謝霆鋒透露曾2次申請紅館期，都被推翻。香港文匯報訊（記者 李思穎）容祖兒(Joey)紅館演唱會前晚已經去到第十三場，每晚嘉賓環節都為粉絲帶來驚喜，當晚便邀得謝霆鋒擔任嘉賓，Joey更鬼馬哼出霆鋒女友王菲的歌曲《你快樂所以我快樂》，平時chok慣的霆鋒難以招架，只懂傻笑走開，同時霆鋒自爆入紙紅館兩年都被推翻，等到頸都長，Joey即為他當場「集氣」，無論幾時大家都會等。
到場欣賞的有狄波拉、許晉亨，側田，Joey的弟弟和太太、老闆楊受成伉儷，Joey在介紹嘉賓霆鋒出場時，大讚對方是超級靚仔：「如果張敬軒係靚仔，佢係超級靚仔，佢平時好chok，但係有一顆溫柔的心，因為我見證過！」Joey即唱出霆鋒經典歌《玉蝴蝶》，霆鋒便隨舞台徐徐升上來，全場歡呼聲震爆紅館。
兩人相擁後，Joey對霆鋒說：「大佬！阿仔點解咁耐唔見，是否在北京忙緊？」霆鋒自言一直在港拍戲，日前飛到外地工作。眾所周知，霆鋒的女友王菲在北京居住，Joey再乘機問：「我以為你係北京過......你呢輪DRY唔DRY......」搞到霆鋒尷尷尬尬。
全場觀眾為霆鋒集氣
接着祖兒表示好開心，指視霆鋒是家人，當邀請他做嘉賓時便一口答應，霆鋒即說：「記得你搵我個日是病緊，我真係聽唔到你講乜，唔知講咗三個咩字，其實我係估，於是叫你唔好講嘢住，你要乜都得，唔緊要，剛剛話我特登回來撐你，其實大家都知不止我一個，全行有好多人都會撐容祖兒，因為佢係一個抵撐的人！」Joey聞言感動得掩面想喊出來的模樣，開心道：「謝霆鋒同我講講呢啲嘢。」
霆鋒：「我好衰，不值得撐我就不撐㗎啦。」Joey又再high起來，「我知，你個人夠真，我們由細玩到大，你成功時我戥你開心，我成功時你戥我開心，歌都有得唱啦：「你快樂所以我快樂......」霆鋒聽到Joey哼起王菲的歌，立時害羞得行開走近觀眾席，令全場大笑。霆鋒笑問，「你幾時變得咁？」Joey得戚笑道，「我幾時都係咁，一個開心有安全感環境我就係咁啦，哈哈。謝霆鋒一路好想繼續同大家開演唱會，你們想唔想？」觀眾即刻起哄回答「想」！
霆鋒便自爆謂：「話時話，我想同呢個空間講，紅館呢個空間，我入咗紙兩年，一次又一次被推翻，再推我就唔開啦。」Joey不知是不是怕霆鋒說話太盡，即打圓場說：「鋒哥，千錯萬錯都係我錯，唔好咁講，你知不知我呢個騷也拿了很耐期先有，無論等到邊一日，今年又好，下年又好，總之大家都會等你啦，係咪？」觀眾報以歡呼聲和應。
接着二人再合唱《阿門》，邊唱邊同觀眾握手，其間Joey不停同觀眾講，「係咪好靚仔，不老的傳說呀，食咗防腐劑。」坦率的Joey十分搞笑。