今日介紹兩匹羅富全馬匹作新季跟進目標，上季煞科日第十場三班千六米，羅廄「全才」姍姍來遲跑第二，其實以此駒實力，新季不愁冇頭馬交出。「全才」為五歲愛爾蘭自購馬，正踏入大熟之年，上季早期已交出唔錯走勢，亦吸引到潘頓攞嚟騎，奈何馬匹未完全適應水土才未能勝出，踏入季尾階段馬匹演出轉穩定，遇到「志在四方」同「關鍵時機」等都輸唔遠，結果喺煞科日展現能力，雖然都只係屈居亞軍，但跑贏三班實力指標「蟲草之星」，相信新季喺三班起步時刻可起作用，而未交代馬匹，倉主羅富全定必及早爭取表現，值得備忘。
另外，「勁無比」（圖2號）上個馬季合共十一度列陣，末段追勢仗比仗強勁，五歲馬經已轉向中距離發展，新季角逐千六米應可也文也武。「勁無比」上季早期專攻千二米短途賽事，四戰獲取兩冠一亞，其後增程跑千四米，五仗跑入兩冠一季表現亦出色；前仗毅然增程跑千六米，結果後上追入季軍，並於好至快地下造出一分三十三秒八二的佳速，賽事水準極高；煞科日縮程跑千四米，因落腳轉慢路程已略嫌短，後上不及獲第四名，負於頭馬不夠一乘。「勁無比」質新分子實力尚未用盡，新季定有更進一步的演出，屆時出戰千六米途程切記多加留意。