香港係金錢英雄地，香港人最鍾意睇嗰啲咩十大富豪榜，無他嘅，就算自己冇咁多錢，睇到人哋有咁多個零，諗吓點駛發吓夢都好！咁大家又估唔估到，香港馬壇邊位係首富？呢啲咁敏感嘅問題，走去問騎練有幾多身家噃，答你嗰個都傻嘅，一陣俾稅局捉返去傾計咪弊，所以都係退而求其次，睇吓公開嘅獎金數字好過啦。
韋達曾經連冧十三鋪冠軍騎師，贏逾千八場頭馬，坊間傳言佢有五億身家，話佢係馬壇首富好多人都會信，咁仲有邊個有機會挑戰佢？莫雷拉？潘頓？大摩？前兩位「年資」太短，啲錢未碌夠呀，反而盃王大摩紮根香港幾十年，由早期八十年代搵到目前，加上投資有度，真係錢識生錢，同韋達有得揮呀。不過唔好數漏一位，就係蔡約翰，佢自從二○○一年馬季來港開倉後，呢十八年十一度登上冠軍練馬師寶座，而近三年獎金都過億，吸金能力真係好勁，另外大家又知唔知道，蔡約翰來港十八載，總獎金累積有幾多？話俾各位知，係十四億二千七百多萬，係天文數字嚟呀，佢自己佔9.2%，即係袋一億三，除番呢二○一八年平均年薪係七百幾萬，好多大公司CEO都冇佢搵咁多，仲未計其他好似馬主打賞、買馬折佣等等收入，蔡約翰仲唔係火麒麟周身癮，少開花費多收入，所以馬壇富豪榜頭三位，蔡約翰應有一席啦。