曾騎「忠心勇士」受非議的潘頓，結果「忠心勇士」再出換莫雷拉即輕勝，而該場潘頓騎「遨遊戰士」成焦點，更令「忠心勇士」收到退熱之效，最妙是下仗「忠心勇士」會再由潘頓騎番，原來潘頓今次騎「遨遊戰士」，只是應承倉主在先，在分身不暇情況下「忠心勇士」才有機會落在雷神手上，由此可見潘頓在摩廄地位是非常穩固，雷神亦未能動搖。
基本上潘頓要向倉主索騎的馬，十居其九必能得心應手，唯一能令他放棄念頭，或是真的沒辦法討來騎的，就只有那些低過一二○磅的輕磅馬，畢竟現今潘頓的最低負磅是一二○磅，他不能接些一二○磅以下的坐騎上陣，所以唯一可以搶到潘頓騎開的實力馬，只有輕磅這個因素。梁家俊上季有機會執到潘頓一隻死雞，便是騎蘇偉賢馬房的「經典之星」（圖黃帽），此駒插四班初出在潘頓胯下以晨操姿態贏馬，賽後加十一分升上三班，再出負輕磅列陣，潘頓便失去這次為此駒披甲的機會，幕後找了與這系馬有淵緣的梁家俊披甲，結果一樣以輕鬆姿態贏馬，以個餘身位贏「帆哥兒」。正所謂有數得計，「帆哥兒」雖然未贏過，但肯定是匹二班尾三班頂實力馬，「經典之星」在梁家俊胯下以半收韁姿態再捷，反映此駒在三班依然有大把上升空間。據知，「經典之星」是馬主親自入貨，並投入蘇偉賢馬房豢養，練馬師亦沒有辜負馬主的心血，操好一出即勝，而初期亦卜定以潘頓為帥，當然日後遇到有馬揀場合才作定論。上季梁家俊冷手執到呢隻馬即贏，今季評分提升，磅位回調即刻落番潘頓手上，目前七十二分馬，今季要起碼贏多兩場才有資格染指一些大錦標賽事，相信呢場三班賽一定難唔到佢，下次上二班跑，馬迷一樣可以揸定銀紙捧場，今季潘頓手上確有唔少短途惡爺出戰大賽任他選擇。