「得勝駒」是韋達第一匹搵潘頓騎嘅馬，臨場被捧成三倍大熱門得第九名。韋達到目前為止贏嘅五場頭馬，三場是沈拿，一場是貝力斯，另一場就係莫雷拉。有心水清馬迷講，韋達知道邊啲馬超級，殺雞又怎會用牛刀，所以季初幾場頭馬，都係用二線騎師，呢個論點又唔係唔啱，大家睇睇雷神所贏嘅「承你所願」，假如唔係雷神騎，用第二個贏唔贏到李寶利隻「金碧科」？大家可以問下自己嘅睇法。韋達搵得雷神或潘頓騎嘅馬，一定有啲難度，「承你所願」季內首戰用雷神，雖只得第二名，但再出能夠補中。潘頓「得勝駒」後，兩騎「超能量」均得亞軍，二奶馬難脫命運，怪不得潘頓。今次潘頓又獲韋達器重，騎隻跑第四班千四米的「順意寶」，此駒今季兩戰俱由何澤堯執韁，首戰在田草千二米後上不及得季軍，再出增程跑千四米僅鬥輸獲亞軍。今次「順意寶」用潘頓，韋達當然計過數，其實呢隻馬喺韋達當騎師時候亦曾騎過並贏得頭馬，今季由賀賢馬房加盟，皆因喺呢個倉翌季再未有頭馬進帳，幕後見韋達開倉，又見係韋達先至贏到，所以支持佢。「順意寶」只曾贏過場谷草千二米，某程度上拉士爆炸力唔會太強，但因為馬性要留住跑一段，所以特別考鞍上人留放工夫，何澤堯現時身手鬥拉士絕對唔會輸得俾任何一位大師傅，所以「順意寶」要換個走位及留放出色嘅潘頓，似足「承你所願」咁，一定要留放功夫好嘅騎師搭夠才有得贏。