■張晉透露兩女兒對弟弟又攬又咀，三姊弟相親相愛很幸福。香港文匯報訊（記者 梁靜儀）張晉與鄧麗欣（Stephy）昨日以「愛滋零標籤愛心大使」身份出席活動，並呼籲大家對愛滋病患者不要帶有歧視。張晉家中最近再添新成員，談到太太蔡少芬有1.5億元資產，更有意為擴大了的家庭搬屋，對此，張晉稱不清楚錢財方面的事，但讚太太持家有道，應使則使，娶到她真是三生有幸。
張晉最近榮升做第三任父親，細仔樂兒不經不覺已出世半個月，他透露老婆蔡少芬 （Ada）湊仔雖然辛苦，但也很享受，笑謂今世應再不會有該些機會。問到可有與老婆爭湊仔？他笑說：「我唔使爭，佢都要我幫，呢個BB成日瞓，有時老婆餵餵吓奶BB瞓咗，叫我幫手拍醒佢，點知到我手抱瞓得仲冧，總之換片同沖涼都係我做，因為老婆坐月唔掂得冷水。」
他又大讚兩個女兒很幫得手，會幫手遞毛巾及尿片，見到她們對弟弟又攬又咀及爭住抱，三姊弟相親相愛很幸福。問到兒子樣子似誰？張晉指兒子跟他兒時很相似，老婆亦笑指兒子似小時候的他。
談到家中再添成員，是否要換大屋？張晉笑說：「買得起至算，（Ada說不夠住？）現在間屋舒服就OK，主要係小朋友雜物多，暫不需要，兩個女成日要瞓埋一張床，我又唔鍾意搬屋，係老婆鍾意貪新鮮感至鍾意搬屋， 好彩佢鍾意老公方面唔係咁。」對於有傳Ada有1.5億元資產？對此，張晉說：「錢我從來唔理，我真係唔知，（佢守財？）持家有道，應使則使係優點，娶到個咁好嘅老婆真係三生有幸，夫復何求。」
Stephy想孖男友演老千戲
Stephy自與台灣男星邱勝翊（王子）拍拖後便經常晒恩愛，近日兩人更以情侶檔一起拍廣告，Stephy笑說：「都係工作啫，冇刻意放閃，係因為我哋都覺得呢個品牌好好，而且拍出嚟效果好，又係聖誕節主題，可以寓工作於娛樂，佢又可以飛過來見面，慳返張機票（錢）。」 問到會否以情侶檔拍戲 ？她坦言不介意在其他工作上與男友合作：「主要睇作品，覺得唔一定要喺戲中都做，唔好咁悶，可以做其他，（演母子？）演母子唔接，可以演敵對，我鍾意睇老千電影，可以我騙佢財，互相呃對方，但唔好搞到我係騙財騙色。」