吳岱融和張振朗出席活動。香港文匯報訊（記者 梁靜儀）吳岱融、張振朗、何雁詩、蔣志光、車婉婉、歐瑞偉、韋家雄、曾航生等昨晚到將軍澳電視城出席台慶劇《牛下女高音》祝捷晚宴，並筵開十二席，會上又公佈大結局7天跨平總收視30.7點，成了本年八點半時段劇集單集收視冠軍。
對於劇集有好收視，吳岱融表示好開心，因聽聞公司有三十點收視才會請食飯，相隔多年返來遇到好角色觀眾支持非常感謝，好開心能遇到大爆這個角色。問到會否開拍續集？他說：「唔知，監製決定啦，不過二月我會拍TVB新劇。」《牛》劇叫好又叫座，問到會否期望攞獎？他坦白說：「之前覺得有得攞獎就更加好，有時喺街知道觀眾反應好，有鍾意你嘅人係開心過得獎，同埋有更多工作實際好多，𠵱家都有啲廣告，個人及合唱團都有，雲頂做騷都有，之後喺吉隆坡又有慈善騷。」
張振朗早前為台慶綵排跳舞時，不幸被吊在半空的攝錄機跌下來壓傷左邊膊頭，他慶幸沒有斷骨，但出現內傷情況，郁動時發力沒那麼好，原本他要為今個月開拍的劇集《踩過界2》操肌，現時都被迫暫停操練，他又笑說：「個個都話我又出事？不過我都唔算好黑仔，今次唔係打中頭，否則毀容，劇組應變能力好好，立即送我入醫院，出院後我即刻去還神，今年已經還咗兩次神，知道自己容易招惹天空物品，𠵱家會學識閃避。」
何雁詩仍在物色公司
何雁詩日前宣佈離開合作五年的唱片公司星夢娛樂，昨晚她出席祝捷晚宴時被問到為何不續約？她說：「純粹因事業上嘅原因，唔係私人問題，想有更出色發展同埋音樂上有多少少意見。」至於會簽哪間公司？她笑言仍在物色中，就像找男朋友一樣， 要找個適合的。她透露與無線仍有藝員及經理人合約：「星夢唔係唔好，係好大嘅平台，接觸到電視觀眾， 不過呢兩年比自己預期嘅production少咗。」
她又否認不再續約的其中一個原因是不想再唱劇集歌曲，問到是否因公司人多分薄了資源？她就說：「又唔關事，但畀我簽約時係多咗，過去兩年出咗兩首歌，自己期望一年出三首，（有冇同公司傾吓？）都同公司傾咗一段時間，（男友鄭俊弘有冇意見？）佢個人一向冇乜意見，工作上佢會畀我做決定，（下次簽一間少歌手的公司？）好難㗎，但合約上會傾得深入少少，（搵巨聲幫朋友搭路？）又未搵，自己唔急嘅。」說到不續約星夢，可會怕影響到拍劇工作？何雁詩語帶不滿說：「應該冇乜影響，就算有都係一部，我兩年至拍一部劇，都想拍多啲劇集。」