■梁翊婷喺fb開post大鬧「612人道支援基金」。 fb截圖煽暴派大台搞所謂「612人道支援基金」，叫大家捐錢支援「義士」，但就一再俾人質疑攬住嚿錢唔鬆手。有「義士」就化名「D小姐」向傳媒爆料，話「612」唔肯批資助，搞到佢只可以用法援下素未謀面嘅律師。唔少網民都鬧爆，連民主黨中委、候任觀塘區議員梁翊婷都喺facebook開post大鬧︰「明明係香港人的錢，邊個授權你去審批？」結果引嚟「民陣」副召集人陳皓桓留言罵戰，質問佢咁樣「係咪互相尊重」。大台咁「唯我獨尊」，有網民就揶揄梁翊婷今鋪得罪方丈︰「妳死啦！『612』都夠膽鬧。」
《明報》噚日（周二）刊出「D小姐」嘅訪問，D小姐話自己喺法援資助下，因為超出資助限額，無辦法起用原本嘅律師團隊，佢轉而向「612」申請資助，但就俾人拒絕，最終只可以用素未謀面嘅律師，自己仲因為咁而徬徨到喊，「突然同我講律師無咗，『612』又唔肯畀錢我打官司，我覺得咩都無晒。」
「612」嘅信託人之一、嶺南大學副教授許寶強回應《明報》時話，擁有「無限資源」嘅法援制度可以為大家提供更大保障，認為有啲人冇辦法由「心儀法律代表協助」，唔等於佢嘅法律權利無法行使，仲好絕咁比喻話大學讀唔到某一科，都唔代表冇讀書。
呢啲咁嘅卸膊言論，當然引起唔少網民聲討，紛紛問「612」收埋啲錢做乜，「Timmy Poon」就精準比喻︰「即係例如我捐錢俾（畀）你醫病，就係想你去搵私家醫生，點知個『基金』叫你去公立醫院排隊先......×。」
「基金」叫人申法援 議辦都識做
梁翊婷亦睇唔過眼，喺fb開post鬧︰「『612』叫人申請法援，申請到，就唔支援？咁唔駛（使）你搞啦，申請法援我議辦都識做啦！......明明係香港人的錢，邊個授權你去審批？Who are you（你係乜水）？」佢認為，「612」應該嗱嗱聲幫人，「唔夠錢就再同香港人籌，唔好阿支阿左揀case（個案）做。愈係咁，大家愈唔想再捐比（畀）『612』。」
呢番人話好快就遭到其他人嘅攻擊，包括陳皓桓就留言罵戰，質問佢先申請法援有咩問題，又話做得「基金」就要有審批，否則就直接做派錢嘅組織算。咁點解唔做派錢組織呢？佢又兜話「法律上極危險」喎。陳皓桓仲好寸咁問，咁唔信「612」，咁咪去搵「星火」或「學聯」囉，反問梁翊婷「如果下下即×，係咪互相尊重？」
梁翊婷就留言暗示「612」向來多問題，但大家本住「唔分化」先唔出聲。陳皓桓繼續勞氣反問︰「有無搵過信託人講過？」講到好似信託人話搵就搵到咁。梁翊婷話有，仲好沙膽咁話︰「一班老將唔好躲在『信託人』三隻字後面吧！」陳皓桓就要佢公開細節畀公眾知，梁翊婷就暫時未有回覆。
都有唔少人撐梁翊婷開聲講人話，「Ho Hin Fishman」反問︰「如果基於法援係政府錢一於洗（使）咗先呢個原則嘅話，咁整612嚟做乜×嘢？如果唔信任就搵『星火』唔搵『612』， 咁捐咗啲錢可以洗（使）去邊？畀『民陣』買音響，唔信任唔係要監督下點樣善用呢批款項嘅咩？」「KC Chan」亦話︰「千瘡百孔，今次運動揭曬（晒）出嚟。」
大台就點都有人撐嘅。「Suen Yip」話︰「唔准妳鬧『612』。星火直頭唔公開收支㖭呀！」「Westlake Tang」亦「提醒」梁翊婷︰「你好似係候任區議員wo（喎），身份唔同左（咗）就諗清楚先再講野（嘢）la（啦）。」「James Pang」揶揄︰「我諗四年後，私怨公怨加加埋埋，阿梁小姐倒嘔幾千票都唔夠還。」「ChiChung Choi」亦恥笑︰「佢真係唔係撈㗎喎！出呢段嘢，問左（咗）胡志偉（民主黨主席）未？」■香港文匯報記者 甘瑜