■方仲賢在fb質疑台灣民進黨利用香港人的鮮血換取台灣人的選票。方仲賢fb 截圖台灣蔡英文方面一直係威係勢咁幫暴徒講嘢，點知原來真係得個講字，到暴徒想去台灣嘅時候，就叫佢哋要「守法申請」，正常人聽完都冷笑，所謂「香港大專學界國際事務代表團」嘅成員、浸會大學學生會會長方仲賢日前就喺facebook要求台灣訂立「難民法」去接濟香港暴徒，如果唔係「難免令人聯想到民進黨有只想用香港人嘅鮮血黎（嚟）換取台灣人嘅選票之嫌」。不過，呢個年輕人似乎唔明到底係邊啲人操控修例風波，言論一出即刻俾大批「同路人」批鬥，噚日佢卒之跪低出聲明，話自己冇咁嘅意思，為自己影響「台灣大選」而鄭重致歉喎，明晒。
指無「難民法」接濟港暴徒
方仲賢見蔡英文方面冷待所謂「義士」，周日喺fb出文解釋點解台灣如果唔立「難民法」，就冇明確機制同渠道去接濟香港「受政治迫害嘅人士」，令港人即使赴台都求助無門。佢話，「今日香港，明日台灣」，所以台灣人「救援」香港人係「必要之義務同戰略方針」，否則「難免令人聯想到民進黨有只想用香港人嘅鮮血黎（嚟）換取台灣人嘅選票之嫌」。
唔少台灣人見到呢番說話，反感稱「台灣人欠你什麼」，鬧完蔡英文仲得罪台灣人，唔少香港嘅「同路人」都即刻轉向鬧方仲賢「戇×」，仲有人質疑佢係「鬼」，喺度搞分化云云。有人仲喺網上討論區「連登」寫長文，話方仲賢之流係「政治暴發戶」、「完全唔×識」點樣叫台灣幫「手足」，仲批評佢哋幫人哋口鬧蔡英文係「無道義」。
轉軚致歉兼幫蔡英文拉票
方仲賢好快都敵唔過網上炮轟，事隔兩日就喺fb出文道歉，話自己唔認為民進黨食「香港抗爭者」嘅「人血饅頭」、唔覺得台灣理所當然要幫香港、對有人就事件借題發揮並意圖影響「台灣大選」鄭重致歉，最後再幫蔡英文拉票，希望台灣人選出代表台灣嘅人，「守好台灣」。
「香港大專學界國際事務代表團」之後亦出道歉聲明，感謝台灣一直以嚟嘅幫助，仲話會「謹言慎行，三省吾身」等等。
睇返過去半年，香港班暴徒鍾意犯法就犯法、鍾意鬧政府就鬧政府、鍾意襲警就襲警，都難怪佢哋覺得自己大晒嘅。不過佢哋對上述惡行唔道歉，鬧完台灣蔡英文就火速跪低，連「義士」俾人「用完即棄」都可以在所不計，收回所有言論再幫蔡英文拉票，幕後boss點指揮，大家見到晒啦。 ■香港文匯報記者 甘瑜