香港文匯報訊（記者 文根茂）泛暴派嘅維多利亞社區協會、灣仔區議員李永財日前同「國難五金」合作賣高價口罩，結果好快俾人發現並鬧爆佢哋食水深，結果佢取消咗活動，叫「國難五金」見財化水。於是乎「國難五金」連同好友喺網上連番狙擊李永財同埋所有質疑佢哋價高嘅人，希望轉變輿論方向，將啲錢拿拿聲收入囊中。
李永財日前俾人發現同「國難五金」合作，原價三百幾、炒價都不過四嚿水嘅3M嘅防毒面具加埋濾棉組合式濾毒罐要賣成500蚊，結果好快俾人發現並鬧爆佢哋食水深，結果係匆匆刪帖當冇事。有市民喺李永財其他帖文下追問佢，以後仲會否同恐嚇要起市民底嘅「國難五金」李政熙合作。李永財才無奈回覆稱，就事件敏感度不足致歉，又稱手法有改善空間，但就未有正面回覆市民提問。
夥老友死撐價錢「合理」
今鑊見財化水，「國難五金」老細李政熙嘅老友、自稱「公民記者」嘅「白影」就出帖發爛渣，死撐價錢「合理」，仲批評李永財等人「被人×兩句就受唔住壓力，點出黎（嚟）行......被人×兩句就頂唔順，呢班完全唔適合做代議士同涉足政治」喎。
「國難五金」喺兩個鐘後都喺facebook聲言：「營商的本質就是謀財，價格隨着需求及供應不足而上升是必然的事。」但同時又咬死自己定價「合理」，叫啲人去深水埗及新填地街走一趟了解市場價格。
「國難五金」仲大鬧：「我一直以來有以這場『革命』的理由要你們奉獻嗎？有以他們的鮮血要你們募捐嗎？」仲指責質疑佢嘅「黃絲」「放棄思考，人云亦云，根本跟那些藍絲廢老完全是同一類人，一種完全沒有自我分析能力，只會道聽途說的人形垃圾」。
「國難五金」又繼續狙擊李永財，話佢係「以『本土』自居，打着抗爭的旗號」嘅「既得利益者」，𠵱家為咗未來嘅選票屈服於網絡輿論，並話果啲買唔到口罩叫人派等都係「人血自助餐的消費者」。甚至將魯迅嘅名言都搬出黎（嚟），暗指自己嘅「好心」反而被人攻擊，用晒咁大篇幅就係想轉移輿論風向，唔好俾任何嘢阻住佢哋發「瘟疫財」。