泛暴派成日高調聲稱自己係「民選」議員，但從來唔見佢哋同市民共度時艱。行政長官同一眾問責官員日前宣佈，未來12個月減薪一成，行政會議非官守議員同建制派政黨都紛紛響應，希望捐筆錢出嚟幫市民渡過疫境，但𠵱個時候就有班人失咗蹤，邊個？咪就係自己人工照加，但又鬧爆官員遲遲未講減薪嘅反對派囉。
有網媒列出官員同議員為抗疫而捐出嘅金額，行政長官、全體司局長上月已捐咗一個月人工畀公益金，今次仲聯同16位行會非官守議員喺未來12個月減薪一成；13名民建聯立法會議員合共捐出300萬元成立「愛心基金」資助失業家庭；工聯會成立咗1,500萬元嘅緊急失業援助金，5名立法會議員亦各捐出近10萬元；反對派暫時就一蚊都冇嘞！
「特首加薪去鬧人，自己加薪隱形人」
網民都話泛暴派真係「絕佳筍工」。「力申木子」就揶揄：「特首加薪去鬧人，自己加薪隱形人！」「Li Ping Yin」就講解份工嘅招聘條件：「冇技求（能）需求，只要識愚民之術和同政府對著（着）幹，有理反（冇）理都反對同拉布就可以做。」
「Icy Ip」就道出反對派伎倆：「叫你眾籌埋畀佢就差唔多！」「jane lam」：「反對派名句：講錢傷感情。」「Samuel Chui」就話聽反對派喺電台節目講嘢聽到火滾：「主持人問鄺俊宇，你地（哋）立法會議員會一齊減薪嗎？依（𠵱）位議員不斷顧左右而言他，主持人再三追問，仍將焦點轉移，最後冇答到，咁就係所謂為民請命嘅議員！」 ■香港文匯報記者 鄭治祖