■Mr.Wally聲稱冇錢買飛想啲人捐錢畀佢，即被審查黃絲身份。 Mr.Wally fb圖片「立場行先」，自然就是非不分。近期成日拎住張「香港人加油！」標語、被黃絲歸類為「同路人」嘅日本街頭藝人Mr.Wally，日前聲稱自己冇錢買飛想啲人捐錢畀佢，即開始被黃衛兵審查黃絲身份，質疑佢冇唱過「港獨」歌，係扮黃搵食，仲猛咁質疑佢喺香港賣唱可能已觸犯入境條例之類。喂，佢賣唱都唔係今日開始啦，原來黃就可以任意犯法，真係長見識了！
查黃絲身份 指食人血饅頭
Mr.Wally日前喺facebook話自己班機受疫情影響被取消，搞到冇錢買貴機票返日本，預告要一連四日喺復活節期間開facebook Live，叫網民如果鍾意佢嘅歌或者音樂，就用網上付款畀啲支持吽A隨即引來班黃衛兵審查佢嘅黃絲身份。facebook網頁「家明」就發帖質疑Mr.Wally喺香港賣親筆簽名卡、賣CD、途人打賞、商業婚禮演出等，唔應該無錢買飛返日本，仲質疑佢高舉「香港人加油」係想食人血饅頭。
「家明」仲力數Mr.Wally「扮黃」之舉，「香港人最水深火熱的時候，他一首『願榮光歸香港』也沒有唱過，縱使是有日文版。理大打緊仗的時候，他仍在街頭唱著（着）忍者亂太郎」，影相表態「五大訴求，缺一不可」，其後卻開宗明義「沒有政治立場，沒有興趣參與政治」，質疑佢「抽水」、「滿口謊言」，話佢唔係「手足」，係「虛偽的日本人，很嘔（惡）心」 。
黃絲facebook 網頁「紅白藍孩 RWBB」都開post講件事，講就講係「不支持鬥黃」，但實質就不斷質疑Mr.Wally冇錢之說，又話「經濟蕭條，大家有錢要謹慎花，有錢請幫助香港真『手足』」，或者支持黃店，捐予外國醫護抗疫「打國際線」云云。
有捐咗100蚊嘅女「手足」去搵Mr.Wally退款，但Mr.Wally就退咗101蚊，話自己入多一蚊因為係想「退回妳給我的支持，因為你選擇相信誰的說話，是我無法強逼的」。「家明」即刻攞咗去開post話佢畀女「手足」一蚊「尤（猶）如帛金」。女「手足」都聲稱「睇清楚佢係咩人」，如果將來該日本人再次在街上表演或行乞，「會放返$1去佢個兜度，再大大聲講還返$1畀你！」
網民：連中立的人都容不下？
不過，都有啲人睇黃衛兵唔過眼。「Roddick Leung 」就話：「香港人何時脆弱得連一個中立的人都容不下？ 自問是支持抗爭的人，但看到這類沒立場就是罪的其實受不了。」「Snow Brown」都話：「呢個地球唔係得黃色一隻色架（㗎）咋。」「Snow Tsang」都質疑：「點解要個日本人表態去支持黃？香港人加油就一定係人血饅頭？」
其實呢期班黃絲可能玩到無嘢好玩，乜都批鬥一餐，商業電台主持人「健吾」噚日都喺facebook話：「無端端話你係黃，跟住話你唔夠黃，唔係佢嗰隻黃，再鬥你話自己嗰隻黃先正宗。呢啲就係而（𠵱）家嘅黃絲。」、「喺街見到痴線佬鬧人，你會唔會仲中埋佢啊？梗係唔會啦。所以黃絲唔係要贏。要自己開心之（啫）嘛。」 ■香港文匯報記者 黃書蘭