■程班長就喺facebook大吐苦水，話自己受夠「虛偽的黃絲正義」。 程班長fb圖片黃即正義？早前就有放假消息前科嘅專頁「阿斯嘉特」日前開post話有所謂台灣「手足」指「程班長台灣美食」係國民黨擺喺香港嘅線眼。此話一出即刻挑起黃衛兵神經，幾大黃絲谷全部走嚟聲討程班長，班長阿妹就無端端鬧對方係「藍絲」，結果引發罵戰。最終程班長就喺facebook大吐苦水，話自己受夠「虛偽的黃絲正義」，亦都因此明白不要再用顏色分人，因為單用兩種顏色分不出真實嘅人品。
被指「間諜」 網掀罵戰
事源網民「阿斯嘉特」喺facebook貼咗個post話有所謂台灣「手足」報料，話要留意「程班長台灣美食」，因為佢哋掛國民黨旗幟，可能係「國民黨在港的線眼」叫黃絲小心。「阿囡搵老豆老母」、「日不落的巨人」等幾大黃絲TG谷，相繼有人走嚟聲討。
老闆程班長嘅妹妹都頗有黃絲一有衰嘢就賴晒落「藍絲」身上嘅作風，係咁話啲聲討佢哋嘅谷係藍絲，叫佢哋FC同道歉。但啲黃絲就唔肯，又叫「程班長」嘅妹妹道歉先。妹妹道歉後「老豆教囝影像」又喺TG攻擊程班長嘅妹妹「道歉的（得）不夠誠意」等等。
黃絲良善？ 我錯了
本以為黃絲即「善良」嘅程班長勁嬲，喺facebook連post數個帖文，話妹妹同啲谷溝通嘅過程中「受了極大的屈辱與委屈」，話佢妹妹話佢哋係藍絲，係佢以為得藍絲先會傷害佢。
佢又話黃絲谷隨意貼文攻擊，推說有人報料就無責任，而「阿斯嘉特」喺溝通過程中嘅囂張氣焰同毫不留情嘅「狠毒」，如此種種都叫自己涼透了心， 感嘆「『不要再說什麼黃店、藍店、黑店、白店』我受夠了霸凌！」「我難過，因為我以為在『香港的黃』是正義的標記；是會互相扶持的好兄弟；是善良的族群。但是，顯然我錯了。」
最後，「阿囝搵老豆老母」都係要道歉，而始作俑者「阿斯嘉特」連page都del埋。噚晚程班長妹妹開post講件事直言「以後不要再叫我哥是黃絲，香港的黃絲不代表正義」，但又話「相信我傻哥也會愛你們如昔」喎！■香港文匯報記者 文根茂