說好嘅齊上齊落呢？喺攬炒派嘅煽動下，噚日社會上又有擾亂社會秩序嘅情況，結果警方又拉咗一大班人，但班攬炒派議員就好醒，個個上facebook「打卡」，扮到自己好似有參與咁，但啲相同片都隔住一大條馬路，名副其實係隔岸觀火，呢啲咪攬炒派議員畀到大家嘅「支援」囉。《輔仁媒體》總編輯容樂其就直言︰「見到啲之前講到好激，呢個鐘數幾百人被捕之後佢仲可以出post，呢啲人一定記住佢。」
楊雪盈盛裝見證「送人頭」
食人血饅頭嘅區議員實在太多，打開fb，先見到灣仔區議會主席楊雪盈戴長耳環着裙，一身米白色裝束，一啲都唔似黑衣暴徒，企到遠一遠幫手數下拉咗幾多饅頭，啊，係「手足」先啱；公民黨個油尖旺區議會副主席余德寶，着住西裝企埋一邊，再上載多張伸長隻手掂空氣嘅相，唔知係咪想表達自己「好盡力」嘞；工黨主席郭永健同樣隔岸觀火，根據佢段片嘅現場聲音，應該同啲師奶企埋一齊；觀塘區議員鄧威文、離島區議員王進洋嘅「打卡照」同遊客到此一遊都冇乜分別；元朗區議員張秀賢張相更係無敵開闊嘅遠景。
民主黨立法會議員許智峯、黃碧雲、林卓廷亦喺旺角現場，「睇住」警員制服最少兩名男子。喂，睇咋？
劉珈汶安坐議辦「打書釘」
呢啲人真係太多不能盡錄，但都要講下黃大仙區議員劉珈汶，出post就以「旺角手足」開頭，但內容竟然係自己喺樂富辦事處搞緊「讀書會」，影張好英嘅相但背景就喺自己辦事處內，連落街打卡都唔敢，你話幾醒目呢。
fb專頁「政治大嬸判」就出post揶揄楊雪盈「身嬌肉貴」，「成6皮幾7皮嘢一個月人工唔通同你衝咩？出事就緊（梗）係即割企到無雷公咁遠啦！況且選舉近喇，咁多人送頭，等食人血饅頭都好合理！不過就唔好同人講今日暫停辦公，支援街坊，請問支援咗啲乜？」
網民「陳山路」諷刺︰「議員唔做野（嘢）邊有錢養手足呀，革命緊（梗）係有啲人犧牲架啦！」「Chu Venus」就話楊雪盈︰「真係同你衝？會戴長耳環、戴珍珠頭飾、著（着）裙仔？家長們俾（畀）啲細路睇下啦！」
有啲網民已經對人血饅頭有好深領悟，將呢種神髓講到繪聲繪影。「Civic Hon Da」話︰「佢望住啲饅頭由心笑出嚟啦！內心講句我唔客氣，起筷啦！」「Kam Tommy」形容︰「拎定麵粉搓饅頭，只差點血。」
「一定要記住呢啲人」
容樂其都出post話︰「見到啲之前講到好激，呢個鐘數幾百人被捕之後佢仲可以出post，呢啲人一定記住佢。」「Joyce Cho」亦留言附和︰「我頭先經過朗豪坊，見到好多十二三歲細路比（俾）人拉左（咗），真係想求班『泛民』唔好情緒勒索，話唔出嚟就乜乜乜，班細路咁細，留返條命緊要呀。」■香港文匯報記者 甘瑜