■仇栩欣在fb帖文「邀功」，話她約見運輸署，要求署方加強巡查區內五金回收舖的違規行為。 仇栩欣fb截圖攬炒派區議員為咗證明自己有「政績」，繼早前淪落到要舉報「手足」非法賽車同外傭違反「限聚令」，最新傑作竟然連拾鐵罐維生嘅老人家都唔放過。網民連群結隊批評東區區議員仇栩欣（「篤灰欣」）唔識民情，滅絕拾荒街坊嘅生路，仲寸佢「篤少日灰係咪會死？」其實，有啲攬炒「素人」自恃「年輕貌美」先有人支持，為咗填補�哋乏善可陳嘅政績，「黃絲」同賣廢鐵賺錢嘅街坊唯有忍讓吓啦。
仇栩欣上個月向警方舉報外傭違反「限聚令」，結果俾「黃絲」同「中箭（香港眾志）」鬧爆唔跟隊形，點知跪低認衰無耐，佢日前又喺facebook邀功，話自己約見咗運輸署，要求署方加強巡查區內嘅五金回收舖，避免啲店舖將廢鐵擺出行車路，同晨早7點就打鐵擾人清夢喎。
「Peter Chiu」就質問：「阿仇議員你有冇晨早6點落去睇吓，有幾多係（喺）附近嘅拾荒街坊推嚟賣紙？......你有冇接觸過回收舖去了解到底回收業界係如何運作？」
「Miu Chu Chan」就「苦口婆心」咁話：「的確回收舖是霸佔位置，的確都真係好嘈吓，但在急於向街坊邀功前都可了解一下回收行家的難處嘅。
「Abraham Lai」就可憐啲回收舖：「宇宙有大量嘈（噪）音，修橋起路起高樓飛機升降......咁叻向弱者抽刃，皆因無權無勢無得走無法轉營無錢用技術處理，唯有坐定定係（喺）舖頭俾（畀）你（仇栩欣）出吓post。」
同道：咪成日郁啲趕人走啦！
曾任社民連副主席嘅周諾恆亦開post暗寸仇栩欣：「以前我做區議員助理嗰時，啲阿婆來叫我幫手趕走回收五金既（嘅）南亞人，我同阿婆講，『人地（哋）搵食嗟（啫），又唔係好阻到地方，大家相就下好唔好呀？咪成日乜春都郁啲話趕人走啦！唔回收拎去堆填又好呀？你屋企有雪櫃要丟（扔）咪又係叫人地（哋）上黎（嚟）推，人地（哋）仲要俾（畀）返錢你！哂（嘥）氣！」
「Wilson Chow」就貼咗張仇栩欣同警察傾偈嘅相話：「又係篤灰欣！」「Yue Lee」就揶揄：「人地（哋）做區議員做到有好多兵架（㗎）。」「Jay Rila」就慶幸話：「唔係深水埗區咋，二手家電回收、天光墟同夜墟......有排佢篤！」 ■香港文匯報記者 雨航