美國真係尊重人權、民主咩？美國明尼蘇達州明尼阿波利斯市日前發生當地警察用膝頭壓住一名黑人男子頸部，監生壓到佢斷氣嘅恐怖「執法」事件，當地市民不滿當地警方濫暴，紛紛上街示威，令州長宣布進入緊急狀態。被香港攬炒派一再「求救」嘅美國總統特朗普竟然喺社交網站出post話會派國民警衛隊（National Guard）「搞掂件事」，呢啲咪就係美國嘅人權同民主囉。
喺網上隨處可見嘅短片顯示，恐怖「執法」事件中嘅黑人男子並無掙扎，表現合作，但依然俾美國警察將佢制伏喺地下，仲用膝頭壓住佢條頸，其間個男子一再講自己唞唔到氣，連路人都忍唔住叫警察要睇下個男子有冇事，強調個男子根本冇郁。結果個黑人男子就咁俾警察壓到斷氣，而事件源頭竟然係因為佢涉嫌用一張20蚊美金嘅假鈔咁「大鑊」。
喺美國，黑人長期俾警方針對、濫暴，有良知嘅市民早就不滿，呢件事更加觸發當地大型示威，亦都出現香港舊年常見嘅縱火等行為。
反對派都睇唔過眼
特朗普噚日就分別喺Twitter同facebook出post，話自己冇辦法對明尼阿波利斯市「袖手旁觀」。以為佢要回應民眾不滿當地警方濫暴嘅訴求？呢件事係唔存在嘅。特朗普先鬧爆該市市長冇領導能力，話個市長如果再控制唔到個局面，佢就會派軍隊去「搞掂件事（get the job done right）」，仲鬧嗰班示威者係暴徒、「侮辱」緊事件中嘅黑人男子喎。佢仲話，只要有人搶嘢，佢哋就會開槍，仲九唔搭八咁講多句「多謝」𠻹。
竟有黃絲當特朗普「救世主」
就連香港反對派嘅「法政匯思」前召集人任建峰都睇唔過眼，喺fb出post話︰「我好頂唔順有啲黃絲竟然會當『侵侵（特朗普）』係救世主。以香港政治光譜嚟講，佢係藍到發黑嗰隻！大家真係覺得一個咁樣睇同對自己人民嘅人會幫香港『捍人權、抗警暴』？唔好咁天真啦。」
不過，所謂「黃納粹」並唔係浪得虛名。「Judy Lam」話︰「我都好頂唔順你成日扮支持民主自由，但又成日對啲年青（輕）人指指點點，何況人地（哋）冇呃過你，共和黨，支持本土為先，有咩問題？唔通支持奧巴馬（美國前總統）養虎為（遺）患？」原來去鎮壓示威者喺「黃絲」眼中係「本土為先」。
另一「黃納粹」「Joe Leung」就開始兜︰「 當然，佢用咗粗鄙嘅thugs（暴徒），又為咗呷（押）韻同順口，用looting（搶劫）之後shooting（開槍），似乎係有D（啲）過份（分），不過又唔駛（使）上綱上線啩......」原來講嘢押韻同順口重要啲？唔知喺吨艉J面特朗普係總統定係說唱歌手呢？「黃納粹」嘅價值觀真係令人大開眼界。
張國鈞：要立法懲美
民建聯副主席張國鈞就喺fb發帖揶揄：「我作為一位關心人權和民主發展的議員，是否應參考美國為香港度身訂做的《香港人權與民主法案》，提出制定《明尼蘇達人權與民主法案》，並且要求政務司司長向立法會每年提交報告，審視當地社會最新狀況？」 ■香港文匯報記者 甘瑜