■當媽一天，李幸倪大呼「好攰」。香港文匯報訊（記者 李思穎）李幸倪（Gin Lee）為了宣傳新歌《敢》，繼踩Roller、學紋身後，未婚的她近日再挑戰湊仔，嘗試當上一日媽咪的滋味，結果她大呼「好攰」！
當日，Gin要化身保姆湊B「過三關」，包括餵BB食蛋糕、換尿片及剪頭髮，過程中搞到Gin手忙腳亂，接受挑戰前她直言心情緊張，當「主角」BB甫出場時，Gin表現興奮，不過BB面對陌生的Gin似乎不太受落，頻頻擰歪面，又放聲狂喊，Gin連環出招，既唱兒歌又扮鬼臉，直至使出自創的「雀仔攻略」即見成效，將BB「融化」拉近距離，她說：「BB一扭計，我就抱佢去睇雀仔，因為好多小朋友都鍾意睇啲郁嘅嘢，例如巴士、車、雀仔，所以呢招『雀仔攻略』係成功嘅。」
輪到餵BB食蛋糕，Gin頻頻「食檸檬」，BB多番擰歪對她不理不睬，最後完全失敗，BB一啖食物都沒放進口，Gin笑說：「以為餵小朋友食嘢會最容易，因為好多小朋友都好饞嘴，結果原來係最難，BB一啖都冇食，反而佢餵咗我食一啖。」
預將來會做全職媽媽
去到換尿片環節，當Gin為BB除褲即傳來BB嚎哭聲，令Gin狼狽不堪，不停問如何除下尿片，最後使出渾身解數，勉強成功為BB換片，但Gin笑言「換片換到出晒汗」。最後，在剪髮環節，手執剪刀的Gin，竟順利地為BB修髮，就連Gin都難以置信表示：「比預期中順利，可能佢好專心玩佢嘅嘢，我可以好快就剪到。」
Gin直言在眾多的挑戰中，「湊B是最難的一項，在精神上好攰，要諗好多計先可以氹到BB；如果我將來要湊小朋友，一定需要Full Time（全職），因為又要工作，又要湊小朋友，體力上好難應付到。」體驗過一日的湊仔，也令Gin不禁大讚天下母親的偉大。