何良從練以來都未試過好似上季咁落泊，要跑到最後一次賽事，仲係要跑到何廄最後一匹參戰馬，仲唔係靠贏夠十六場頭馬上岸，而係要靠幾場位置加加埋埋，得以令佢全季總獎金累積逾2,113萬，剛好突破最低獎金2,100萬嘅安全線，驚濤駭浪下保得住清白之軀。
巫顯東可以話係何良馬房護級重要功臣，因為上季煞科當晚佢騎何廄隻「盛大光輝」，放到最後五十米被田泰安騎嘅「太陽威威」趕過，但仍能頂得住另一匹路程專家「綠色有運」的衝刺而得亞席，為何良增添462,000獎金，成功湊夠數。
查何良與巫顯東是在16/17馬季開始合作，首季合作巫顯東為何廄貢獻咗三場頭馬；到咗第二季即係17/18馬季，兩人合作明顯增多，整季攜手贏得七場頭馬；到咗前季即係18/19馬季，兩人合作的頭馬更達到九場，何良該季贏得31場頭馬，計落比例相當重，即使上季何廄處於低潮，全季埋單只得十五場頭馬，巫顯東亦為其帶來四場頭馬進帳。今季何東呢個組合相信仍有留意價值，雖然唞暑期間何廄養馬量跌至三十幾匹，但只要何良季初能贏番幾場穩住軍心，自不愁無兵源補充，而幾匹「怪獸」系馬相信會是此廄今季嘅先頭部隊。