■郭富城、林建岳及楊千嬅出席首映禮。香港文匯報訊 （記者 李慶全、梁靜儀）由新晉導演黃慶勳執導，鄭保瑞監製，郭富城（城城）、楊千嬅、鮑起靜、張達明及顧定軒等主演的電影《麥路人》，昨晚於尖沙咀舉行首映禮，老闆林建岳亦有到場支持，影片將於本周四香港、內地、台灣、新加坡四地同步上映。
城城表示影片拍竣兩年，終於能同大家見面感到很開心，他亦收到很多fans留言表示好期待影片上映。他指影片原定去年聖誕上映，因遇上疫情而取消，雖然疫情暫時都未完全受控，仍然困擾大家，但希望觀眾慢慢走出負面情緒，最好的方法是睇電影，尤其睇這正能量的電影。
千嬅：要帶定紙巾入場
影片之前放映了幾場優先場，城城表示很開心有好口碑。問到太太方媛睇了電影沒有？城城大爆太太睇到喊：「太太今（昨）晚都有來同我一齊睇，太太睇完喊到『啡喱咈咧』，(點安慰太太？) 我咪同佢一齊『啡喱咈咧』囉，太太之前睇過一次，今次係睇第二次，我自己就睇咗四次，每次都睇到喊，因為受到角色人物牽動。」
旁邊的千嬅亦認同要帶定紙巾入場。城城認為帶紙巾都不夠，要帶手巾仔。問到千嬅可會帶兒子去睇這部戲？她說：「阿仔大個啲可以睇，我會一路睇，一路解釋畀佢聽，因為部戲好正能量。」她又稱作為演員，覺得今次的演出好豐富，因為她真的是以陌路人身份來演出，因為她是第一次跟所有演員合作，是中間才加入劇組，但一點陌生感都沒有，還感覺到好有團隊精神，電影內容又有張力，全部都是好對手。
說到影片幾次宣傳活動都不見萬梓良（萬子）出席？城城指萬子哥是好敬業樂業的演員，對方現身在廣州，又有長期病患，但為了拍戲更停藥，他說：「我特別開心係因為萬子哥話能同我合作，就算自己有病幾困難都想同我合作，我哋繼電視劇《成吉思汗》後30年未有合作，同萬子哥合作好難忘，祝願佢病情好轉，身體健康，都想再同佢合作。」
鮑起靜（鮑姐）表示雖然戲份少，但影片好感人，亦都很正面，尤其是講社會最低層如何掙扎生存，睇了一定會喊，她自己睇了兩次，兩次都喊。