■「土皇帝」日前喺fb反駁「同路人」，強調自己冇搞活動賣「手足」。 「土皇帝」fb截圖攬炒派搞事變送頭都唔係第一次見。facebook專頁「土皇帝」10月1日喺土瓜灣發起「毋忘手足中秋晚會」，俾「同路人」鬧活動宣傳得太早太詳細，變相約晒啲「手足」出嚟畀警察截查，仲有人被票控違反限聚令，而且主辦人仲有心機接受訪問，俾人話係想攞「光環」。班「黃絲」講講吓變咗互相指責，仲踢爆「土皇帝」個專頁管理人係民主黨議員林卓廷（鴿廷）嘅助理，叫佢下次再搞呢啲賣「手足」活動，一定要掛返民主黨支旗出嚟畀「手足」認住嘞。
「土黃帝」專頁管理人近日喺fb貼文反駁「同路人」，聲稱晚會只係摺吓燈籠、寫吓明信片，純粹想同街坊過中秋，又話如果警方唔嚟阻撓，就唔會有記者嚟訪問，所以話佢攞光環呢個講法「好可笑」喎。
不過好多「黃絲」就唔認同佢，因為當晚有唔少人被截查，亦有人被票控。「Man Hi」就批評「土皇帝」喺Telegram同fb落足力吹雞，但就冇向警方申請不反對通知書，等同幫參加者「預約拘捕」，又問到如果真係有人因為咁被捕，係咪「土皇帝」負責。
撐「土皇帝」嘅「Wong Pui Chim」就叫「同路人」槍口對返外面：「如果搞任何活動，哪怕只係呢種咁小型嘅街坊聚腳活動都等於『預約拘捕』，咁以後咩都唔洗（使）做啦......要×都應該係×班『狗』亂×落地查人證先，唔係下（吓）下（吓）都×個搞手。」
「土皇帝」：我知後生對我份工冇好感
眼見「同路人」唔幫自己，「Man Hi」就踢爆「土皇帝」原來係民主黨議員林卓廷嘅助理，「其實你老老實實攞返民主黨支旗出嚟咪得囉！」
「土皇帝」都冇否認，仲話：「我其實知普遍後生對我份工冇好感，我自己都唔係完全認同所有理念。」
點知攬炒派九龍城區議員李軒朗竟然出嚟護航，仲暗示「土皇帝」身在「飯民」、心在「抗爭」，「九龍西『初選』佢支持我有份參與嘅『本土派』團隊。」佢仲話︰「其實講得出佢做咩職業，我相信個source（來源）都曾經甚至而（??）家都仲係『同路人』，唔明點解要淪落到用假account（賬號）嚟攻擊『同路人』，見到真係好鬼sad（傷感）。」
「Abby Li」就搲晒頭：「應該好多『抗爭派』議員請人？係咪佢哋份糧唔夠民主黨議助高？講到咁支持『抗爭』仲留係（喺）民主黨？」「Chan Chi Lam」就話：「話唔定係無間道呢。」 ■香港文匯報記者 雨航