《蘋果日報》噚日喺報道中堅稱，台灣《蘋果日報》分別於10月16日及23日獨家報道有關拜登兒子亨特同埋佢好友林俊良喺台灣活動嘅新聞，係佢哋記者自己調查仲做晒求證。不過，網民就唔多買賬，質疑如果係事實報道而唔係作嘢屈人，唔明點解黎智英一方要急急卸責，仲反問咁唔係自相矛盾咩？
報道拜登仔動向 《台蘋》稱已查證
《蘋果日報》噚日除咗花大篇幅澄清絕無委託美國學者撰寫拜登報告外，又力申台灣個兩單關於亨特同林俊良嘅報道係台灣記者獨家調查及採訪取得，亦都有向相關當事人查證；當中有關亨特及林俊良嘅釵h資料，包括訪問內地同台灣嘅新聞稿及照片，均來自林創辦的桑頓集團（Thornton Group）網站等。
台灣蘋果新聞網數位總編輯邱銘輝仲話，《台蘋》引用嘅報告同美國全國廣播公司（NBC）所報道同埋網上流傳嘅版本同頁數都有分別。不過，翻查《台蘋》10月中報道，喺公開嘅報告部分內容睇，同個美國學者以虛構身份發表嘅「Typhoon Investigations」報告，行文好似，只不過喺小小事實描述上有啲唔同啫。
既然《蘋果》都堅稱自己係報道事實，就唔知今次點解搵人撰寫相關文件嘅黎智英助手Mark Simon又要致歉辭職，黎智英又要撇清關係，如果都係講事實，好似又冇乜好驚。網民「Ka Yat Wong」就話「又唔係作，係事實wo（喎），講人地（哋）事實唔係作野（嘢）屈人，你（Mark Simon）做咩自責呀？報導（道）真野（嘢）自責？」網民「Nymph Chan」就覺得「Mark Simon自己認咗係搵人撰寫，完全老作。否則洗（使）乜辭職？」「黃臻」就唔信《蘋果》方面嘅解釋：「係作新聞，仲要係收錢作新聞， 仲話什麼公平報導（道）事實報道？」
■香港文匯報記者 文根茂