傳統「飯民」終於成功自行攬炒，同DQ4綑綁住消失於立法會。傳統「飯民」以為自己嘅舉動好「悲情」，會令佢哋得到好多民意支持，但實際上好多「抗爭派」不斷恥笑佢哋抵死。傳統「飯民」抵唔住頸鬧返轉頭，結果互揭對方臭史：「飯民」鬧「抗爭派」未瞓醒，唔記得晒「飯民」曾經聲援「抗爭派」，「抗爭派」就貼埋新聞重揭「飯民」當年企圖搶「抗爭派」議席，真係派到成地花生呀。
搬梁游鬧「飯民」割席
傳統「飯民」用「鬧辭」將自己塑造成悲情人物，但喺各懷鬼胎嘅攬炒派陣營，又邊有咁易。前「香港眾志」秘書長黃之鋒就借住講點做文宣出post，話4年前好多人覺得「本土派」抵死，今日就覺得「DQ4」抵死，又話當年被DQ嘅梁頌恆同游蕙貞「缺乏民主派支援」、被懷疑係鬼，再踩多腳先入正題話︰「就算有人覺得政客呢刻食相真係難睇，未來幾星期我地（哋）都急需要一套抗衡『藍絲』動員的文宣工作。」
黃之鋒呢番句句有骨嘅說話，都刺痛咗一直力撐「飯民」嘅「香港民意研究所」副行政總裁鍾劍華對眼，鍾劍華憤而留言︰「真係枉費咁多『民主派』政黨及議員長期對你咁支持及保護！」
睇怕鍾劍華都要嬲好多人。前「大專國際事務代表團」發言人張崑陽亦話如果當年傳統「飯民」唔同梁游割席，「過去派系間的隔膜會否少了點。」
借梁天琦揶揄楊岳橋
網民「翼雙飛」就數埋「獨人」梁天琦筆數落去，話「DQ4」之一嘅楊岳橋俾人笑得最犀利係有原因嘅，事關2016年立法會新界東補選，楊岳橋贏咗梁天琦，「如果（梁天琦）佢當選，佢就係第一個因暴動罪入獄六年嘅香港立法會議員，成日講話要國際曝光，呢個曝光係咪有用過你楊岳橋多多聲？」外號「黑人」嘅「Takki Ma」亦揶揄楊岳橋︰「笑佢都費事，追薪津再話我知。」網民「希布」都話︰「傳統『飯民』今時今日咁，全部都自己攞黎（嚟）。」
不過，傳統「飯民」都有自己支持者。網民「David Chan」就話傳統「飯民」從來都冇講過同意DQ梁游，又話「抗爭派」今日所講嘅「割席」，只係傳統「飯民」中有人表達過唔同意梁游嘅言行喎。之後就話「飯民」曾經幫梁游開路宣誓、曾經搞黑衣遊行反DQ，質疑張崑陽同黃之鋒「當刻係打緊機定未瞓醒」。
佢有佢牙尖嘴利，「抗爭派」早就儲咗一堆罪證準備隨時貼堂鞭屍。其中，當年被稱為游蕙禎「Plan B」嘅袁健恩就喺fb貼咗當年袁海文想搶游蕙禎俾人DQ個位嘅新聞出嚟，當時袁海文話「睇唔到要畀返青政」喎，袁健恩反問︰「你都唔覺自己錯，咁有咩好講？根本大家由對現實嘅理解到立場取態都唔同，仲有咩好傾好團結？」
■香港文匯報記者 郭家好