正所謂有因必有果，過去一年半黑暴纏繞香港，不斷破壞治安及市民人身安全，但攬炒派不單冇阻止，反而火上澆油，行為極度可恥。攬炒派前議員區諾軒噚日選擇對前年8月18日「流水式集會」兩項控罪認罪，《明報》噚日亦刊登佢嘅專訪，文中透露佢曾經邀請「有頭有臉」嘅人幫手撰寫求情信，但被拒絕，又聲稱官司纏身以致「心力交瘁」，所以決定喺本案認罪，唔知係咪要扮可憐博法庭同情。多名建制派人士以及市民就唔多buy佢呢款扮可憐嘅博同情樣，有人就質問佢：「啲人扔汽油彈嗰陣又唔見話心力交瘁？」
區諾軒聲稱，舊年為佢寫求情信嘅社會賢達，部分拒絕為本案再寫，於是扮晒嘢話：「有苦自己知」，又稱喺前年8月底首次被捕後便終日活在「惶恐」中，「每日都憂慮是否有警察拍門，憂慮人生還可以跌到什麼地步」，並再次博同情稱因為官司纏身以致「心力交瘁」，故決定喺本案認罪。
面對區諾軒咁厚顏無恥嘅扮可憐，民建聯立法會議員張國鈞就質疑：「又話無怨無悔，監都未坐就已經心力交瘁，拎住大聲公叫啲後生仔衝去送頭，自己食人血饅頭嗰陣又唔見話心力交瘁？！」民建聯立法會議員陳克勤亦問市民大眾：「大家會同情他嗎？」
全國政協副主席梁振英就話，《蘋果日報》經常為被捕被囚嘅犯人打氣，噚日李八方喺政治八卦專欄寫，「八方祝願：在囚手足平安，早日重獲自由，面對『極權』最緊要『頂住』」，偏偏同日《明報》登咗區諾軒嘅專訪，質疑內文引述區諾軒所講嘅：「我已經不敢再寫文章，因為在目前的環境，多說一句便多一份危險」，就係「李八方」所謂嘅「頂住」？
事件亦令好多網民感到氣憤，認為佢理應伏法，對佢扮可憐根本冇同情。「Tak Kong Lou」質疑：「（區諾軒）當日嘅霸氣同氣焰呢？」「Brian Kwan」批評：「當日搞亂香港和荼毒咁多青年我哋受晒，而（??）家既（嘅）結果邊會有人同情？割得快好世界啦！」「May Yee」認為：「講到咁慘，講埋之前做咗咩事先啦，有前因必有後果，慢慢還。」「Hung Tong Yu Man」斥責：「心力交瘁得過黑暴時香港警察同正常市民？」「Eric Martin」同樣質問：「想問一句，收取政治黑金嗰陣，有冇心力交瘁？」亦有網民「Tony Ng」揶揄：「打電話問問許智峯，做咩當日歐遊唔買多張飛俾（畀）你，咁樣點做兄弟！?」●香港文匯報記者 郭家好