為咗呃多幾個like，有啲「黃絲記者」日前去咗南山邨夜市，仲直播當時非法食檔人頭湧湧嘅墟冚情況，當中包括一直「撐暴」、聲稱係「獨立記者」嘅「白影」，佢好巴閉咁聲稱佢哋令到場要求市民戴返口罩嘅警察「敗走」，點知過咗無耐，成個小食檔被圍封，搞到啲「黃絲」係咁鬧班記者。唔知係咪為咗轉移視線，自稱「公民記者」嘅「白影」就跳出嚟話有「熱狗」咬佢，仲起埋某個「熱狗」底，話佢人品好差、打女人。而疑似被點名嘅「熱血公民」副主席鄭錦滿就喺fb發帖鬧返「白影」係第一時間屈啲鬧自己嘅人為「熱狗」解圍。真係好一場「狗咬狗」嘅大戲。
話說年初三（14日）晚，「白影」去到南山邨夜市開直播，一直影住當時人流眾多嘅畫面，又咁啱遇到有警察到場，要求在場正大快朵頤嘅一眾市民佩戴口罩，於是他聲稱：「（警察）被現場記者引用『進食獲豁免』的條例，及一眾市民怒小而『敗走』。」講到自己好巴閉好威水咁。不過，由於嗰度嚴禁非法擺賣熟食，好快被當局圍封。
如此一來，啲「黃絲」係咁鬧班記者，「白影」就唔知係咪想推卸責任，就無啦啦跳出嚟話，聽個讀者朋友講，有「熱狗」咬佢，仲指以前有「熱狗」人品好差，例如當時嘅女朋友都對佢申請加入個女朋友身處嘅「本土組織」時，女友竟投下反對票；當佢參選輸咗時，好多義工開晒香檳慶祝；以及返返吓工玩失蹤，之後仲面不改容返去攞人工等。
鄭錦滿發帖反擊「狗咬狗」
而疑似被點名嘅鄭錦滿噚日發帖，先係反咬「黃色搵食記者」直播屋邨小食檔，搞到成條邨被圍封收檔，仲鬧埋廣康嗰位攬炒派區議員，叫班記者學吓吽G「係唔係都屈啲商戶係『藍店』、係『鄉黑』、係『熱狗』！咁咪解到圍囉！」之後反擊「白影」嘅心虛，揶揄：「『白影』都第一時間親身示範咗，無啦啦話有『熱狗』咬佢，其他記者都唔識跟，真係好×蠢！」
呢場「狗咬狗」嘅大戲令網民新年食足花生，「Kars Lam」揶揄：「一spin去『熱狗』到（度）就咩問題都唔係問題。」「Jimmy Lau」就揶揄：「唔buy泛民就『熱狗』，唔buy『熱狗』就『黃絲』。」貴圈真係有夠亂呢。