●《立場新聞》開晒名踢爆「黃店」唔用「安心出行」嘅「招數」出嚟，結果俾「黃絲」網民鬧爆。《立場新聞》fb截圖黃網民怪《立場》開晒店名篤灰 隨時禁堂食累死自己
特區政府喺聽日（年初七）開始放寬食肆防疫禁令，包括延長堂食至晚上10點，並容許最多4人一枱，不過，顧客入場時必須掃描「安心出行」二維碼或登記個人資料。攬炒派同「黃店」隨即以「侵犯個人私隱」為由，恐嚇市民唔好用「安心出行」，唔少「黃店」更私下密謀走精面抗衡政府規定，點知《立場新聞》就傾力演出「豬隊友」，將呢啲「黃店」嘅名同抗衡政府規定嘅招數報道晒出嚟，結果當然俾大批「黃絲」網民圍剿啦！●香港文匯報記者 雨航
近日疫情緩和，唔少市民終於等到政府放寬食肆防疫禁令，亦願意配合掃描「安心出行」嘅規定，以便必要時藉行蹤記錄接受檢測。
用咩招數都爆晒出嚟
不過，《立場新聞》噚日就以《政府強制食肆初七起用「安心出行」「黃店」變招抗衡》為題報道，開晒名踢爆「黃店」嘅抗衡招數。例如「開餐 Dine inn」會叫顧客入場前喺卡上填個人資料，然後自行放入收集箱，職員唔會查閱亦唔會核對顧客資料；「616牛肉火鍋專門店」就表明唔會叫顧客用「安心出行」，話客人只要掃描店舖內嘅Google Form二維碼並填寫就得，佢哋亦唔會查閱相關資料；「壹碗壹碟」則稱只做外賣生意，令顧客唔使掃描「安心出行」或登記資料。
唔少「黃絲」網民睇完《立場新聞》篇報道都火滾，好似「Lau Lot Hymn」就話：「真係好On ×，我明白Take Side要出一篇新聞點都畀大家一D（啲）希望，但係可唔可以唔好On ×到開埋名。」
「Jacky Au Yeung」就話：「有咩好得過做垃場（《立場新聞》）報道，又可以幫政府篤灰又可以呃堆『深黃』傻粉覺得佢（《立場新聞》）好『黃』。」
「Kevin Chan」就揶揄：「喺篤灰方面，立場（《立場新聞》）的確係有一手。」
或搞到黃店「安心上路」
「Will Ng」就問：「會唔會delete post？」「Frankie Ngai」亦質問：「不如你出晒成個黃店list呀笨！」
「Joey Mok」就揶揄：「今次啲黃店真係『安心上路』，分分鐘到時真係爆黃店感染群組冇得查，一陣封咗唔准堂食又係自己累死自己。」